İsrailin təhlükəsizlik nümayəndəsinin bəyanatına əsasən, Qəzza sektorundan Misirə daxil olmaq üçün yeganə buraxılış məntəqəsi olan “Rafah” sərhəd məntəqəsi bu gün açılmayacaq.

“Sky News”un yazdığı kimi, indiyə qədər yayılmış rəsmi məlumata əsasən, məntəqə bu gün, oktyabrın 15-də açılmalı idi.

İsrailin rəsmi şəxsləri hazırda hazırlıq işlərinin getdiyini izah edirlər.

Bir az bundan əvvəl İsrail hakimiyyətinin nümayəndələri “HƏMAS”ın həlak olmuş bütün girovların cəsədlərini İsrailə təhvil verə bilməməsindən sonra “Rafah” keçidinin bağlı qalacağını və Qəzzaya yardım axınının azalacağını bəyan ediblər.

Oktyabrın 14-də gecə “HƏMAS” İsrailə dörd cəsədi təhvil verib. İsrail tərəfi “HƏMAS”ın daha 20 cəsədi təhvil verməsini gözləyir.