İsrail Donald Trampın təşəbbüsü ilə İranla ikitərəfli atəşkəsə razı olduğunu təsdiqləyib, lakin qeyd edib ki, razılaşmanın istənilən pozuntusuna sərt şəkildə cavab veriləcək. Bu barədə məlumatı İsrail mediası yayıb.

İsrailin Baş naziri Benyamin Netanyahunun ofisinin verdiyi məlumata görə, Netanyahu kabinet, müdafiə naziri, Müdafiə Qüvvələri və “Mossad” rəhbərləri ilə görüş keçirib və bildirib ki, İsrail əməliyyatın bütün məqsədlərinə və ondan da artığına nail olub.

“İsrail həm nüvə, həm də ballistik raket sahəsindəki ikiqat birbaşa varlıq təhlükəsini aradan qaldırdı. İsrail Müdafiə Qüvvələri Tehran səmasında tam hava nəzarəti əldə etdi, hərbi rəhbərliyə ciddi zərbə vurdu və onlarla obyekti məhv etdi,” – deyə bəyanatda qeyd olunur.

Bununla yanaşı, bəyanatda qeyd edilir ki, İsrail ABŞ-a və Prezident Donald Trampa dəstəyə görə təşəkkür edir.

“İsrail Prezident Trampa və Amerika Birləşmiş Ştatlarına göstərdikləri dəstəyə görə təşəkkür edir. Əməliyyatın məqsədlərinə nail olunmasını və Prezident Tramp ilə tam koordinasiyanı nəzərə alaraq, İsrail Prezidentin ikitərəfli atəşkəs təklifinə razılıq verdi,” – deyə bəyanatda bildirilir.