İsrail Qüdsdə Böyük Britaniyanın səfirliyini bağlayacaq, ölkə həmçinin İsrailə girişinə qadağa qoyulan britaniyalı şəxslərin adlarını açıqlayıb

İsrail Qüdsdə Böyük Britaniyanın səfirliyini bağlayacaq. Bu barədə İsrailin xarici işlər naziri Gideon Saar məlumat yayıb.
İsrail Xarici İşlər Nazirliyi, həmçinin, Britaniya parlamentinin İcmalar Palatasının 11 deputatına və bir vəkilə ölkəyə giriş qadağası qoyub. „The Times of Israel“in məlumatına görə, bu qərar Böyük Britaniyanın İordan çayının qərb sahilindəki yaşayış məntəqələrinə qarşı tətbiq etdiyi sanksiyalar paketinə cavab olaraq qəbul edilib.

Medianın məlumatına görə, İsrailə „Yaşıllar“ Partiyasının 5, hakim „Leyboristlər“ Partiyasının 4 və „Sənin partiyan“ın 2 deputatı buraxılmayacaq. Vəkil Fəhad Ənsariyə də İsrailə giriş qadağan edilib.

Nəşrin məlumatına görə, Ənsari Britaniya məhkəməsində HƏMAS-ın siyasi qanadını təmsil edib.

Medianın yazdığına görə, Xarici İşlər Nazirliyi qadağaların konkret səbəbini açıqlamayıb. Bununla belə, qeyd edib ki, ölkəyə antisemit və İsrail əleyhinə fəaliyyətlə məşğul olan, eləcə də İsrail dövlətinin mövcudluğunu inkar edən şəxslərin girişinə icazə verilməyəcək.

Qeyd edək ki, səfirliyin bağlanması qərarından əvvəl Böyük Britaniyanın xarici işlər naziri Ed Milibənd bəyanatla çıxış edib. O bildirib ki, Britaniya hökuməti İordan çayının qərb sahilində fələstinlilərə qarşı etnik təmizləmənin yerli terrorçular tərəfindən həyata keçirildiyi, İsrail hökumətinin isə buna göz yumduğu fikri ilə razıdır.