İsrail mediası: Binyamin Netanyahu Birləşmiş Ərəb Əmirliklərinə gizli səfər edib və ölkə liderindən Netanyahuya “HƏMAS” tərəfindən gözlənilən təhlükə barədə xəbərdarlıq etdiyi haqda məlumatı təkzib etməsini istəyib

Binyamin Netanyahu ötən həftəsonu Birləşmiş Ərəb Əmirliklərinə gizli səfər edib. O, ölkə liderindən Netanyahuya “HƏMAS” tərəfindən gözlənilən təhlükə barədə xəbərdarlıq etdiyi haqda məlumatı təkzib etməsini istəyib. Bu barədə İsrail mediası yazır.

Medianın məlumatına görə, Netanyahunun səfərindən xəbərdar olan iki şəxsin sözlərinə əsasən, sentyabrın 27-də İsrailin Baş naziri Birləşmiş Ərəb Əmirliklərinin prezidenti ilə bir saatlıq görüş keçirib.

İsrail mediasının məlumatına görə, danışıqlarda İsrailin gündəlik “Haaretz” qəzetində bu ayın əvvəlində dərc olunan məlumat müzakirə edilib. Həmin məlumatda BƏƏ liderinin Netanyahunu “HƏMAS” tərəfindən gözlənilən hücum barədə xəbərdar etdiyi bildirilirdi. Söhbət 2023-cü il oktyabrın 7-də müharibəyə səbəb olan genişmiqyaslı hücumdan bilavasitə əvvəl verilmiş xəbərdarlıqdan gedir.

Netanyahunun ofisi daha əvvəl “Haaretz” qəzetinin məlumatını təkzib edib. Birləşmiş Ərəb Əmirliklərinin Xarici İşlər Nazirliyi isə sözügedən görüşlə bağlı xəbərlərə şərh verməkdən imtina edib. Bununla belə, nazirlik İsraillə “açıq və birbaşa kommunikasiya kanallarını” qoruduğunu və “bütün müvafiq kəşfiyyat məlumatlarını” İsraillə bölüşdüyünü bildirib.

Netanyahunun ofisi tərəfindən bu mərhələdə hər hansı şərh verilməyib.