Amerika Birləşmiş Ştatları ilə danışıqların dördüncü raundu zamanı mübahisəli məsələlər üzrə daha yaxşı anlayış oldu – bu barədə İranın xarici işlər naziri Abbas Arağçi Omanda keçirilən danışıqlardan sonra bildirib.

İran Xarici İşlər Nazirliyinin rəhbəri bildirib ki, uranın zənginləşdirilməsi davam etməlidir və burada kompromis imkansızdır.

“Lakin, etimadı artırmaq üçün müəyyən müddət ərzində onun ölçüsü, tempi, həcmi və səviyyəsi baxımından məhdudiyyətlərə icazə verə bilərik. Hərçənd, zənginləşdirmə mahiyyət etibarı ilə danışıqların mövzusu deyil. İran öz nüvə proqramına məhdudiyyətlər müqabilində sanksiyaların aradan qaldırılması üçün ABŞ-la danışıqlar aparır. Sanksiyaların aradan qaldırılması danışıqların əsas elementlərindən biridir və bu, hər iki tərəfin razılaşdığı məsələdir. Dediyim kimi, indi mübahisəli məsələlərdə bir-birimizə daha da yaxınlaşmışıq. İndi bir-birimizi daha yaxşı başa düşürük” – Abbas Arağçi bildirib.