İranın dövlət informasiya agentliyi Tasnim News Agency xəbər verir ki, İran ilə ABŞ arasında heç bir danışıqlar aparılmayıb.

Agentliyin yüksək vəzifəli mənbəyə istinadən yaydığı məlumata görə, İran hakimiyyəti “vasitəçilərdən mesajlar” alıb, lakin iki ölkə arasında birbaşa danışıqlar başlamayıb.

Məlumata görə, ABŞ prezidenti Donald Trump kritik infrastruktura hücumların dayandırılması barədə qərarı İran tərəfindən hərbi təhdidin daha real xarakter alması fonunda verib.

Həmçinin bildirilir ki, ABŞ prezidenti qlobal iqtisadi böhran ehtimalından da narahat olub.

“Danışıqlar aparılmayıb və hazırda da aparılmır. Belə psixoloji müharibə şəraitində nə Hörmüz boğazı əvvəlki vəziyyətinə qayıdacaq, nə də enerji bazarlarında sabitlik olacaq. Trampın beşgünlük ultimatumu bu rejimin xalqa qarşı cinayətkar proqramının davamı deməkdir və biz də davam edəcəyik”, — deyə agentlik yüksək vəzifəli şəxsin sözlərini sitat gətirir.

Qeyd edək ki, bundan əvvəl Donald Trump ABŞ ilə İran arasında “çox yaxşı və məhsuldar” danışıqlar aparıldığını bildirmiş və Yaxın Şərqdəki münaqişənin həllinə yönəldiyini qeyd etmişdi. Eyni zamanda, onun qərarı ilə ABŞ İranın elektrik stansiyaları və enerji infrastrukturuna zərbələri beş gün müddətinə dayandırıb.