İranın dövlət mediası ABŞ Prezidenti Donald Trampın növbəti təhdidi və İran hökumətinin çağırışı fonunda iranlıların ölkənin əsas elektrik stansiyaları və körpüləri yaxınlığına toplaşdığını xəbər verir.

Media tərəfindən yayılmış şəkillər və videolarda onlarla insanın ölkənin əsas strateji obyektləri yaxınlığına necə toplaşdığı görünür. İranlılar ölkənin cənub-qərbində Ahvazda yerləşən tağlı körpü boyunca toplaşıblar, digər bir şəkildə isə Tehran yaxınlığındakı Şəhid Rəcai elektrik stansiyasının qarşısında dayanan bir neçə nəfər görünür.

Məlumat üçün bildirək ki, bu gün İran hökuməti tələbələri, idmançıları, sənətçiləri və texnologiya şirkətlərinin əməkdaşlarını elektrik stansiyalarının ətrafında toplaşmağa və canlı zəncirlər yaratmağa çağırıb. İranın gənclik işləri nazirinin müavininin sözlərinə əsasən, canlı zəncirlər aksiyası ABŞ və İsrailin dövlət müəssisələrinə hücumlarına etiraz etmək məqsədi daşıyır.

Bununla yanaşı, “Financial Times”ın məlumatına əsasən, İran hakimiyyəti bu çağırışı ABŞ və İsrailin İranın vacib infrastrukturuna zərbə vurmaqla bağlı təhdidləri fonunda edib.