İran ordusu Küveytdə ABŞ bazalarına dronlarla hücum həyata keçirib

İran ordusu Küveytdə ABŞ bazalarına dronlarla hücum həyata keçirib. İran mediasının məlumatına görə, ölkə ordusu Küveytdə yerləşən ABŞ-a məxsus iki əsas hərbi obyektə pilotsuz uçuş aparatları ilə zərbələr endirib. Hədəflərin sursat anbarları, radar sistemləri və logistika infrastrukturu olduğu bildirilib.
İran ordusunun bəyanatına əsasən, zərbələr ABŞ-ın İrana qarşı həyata keçirdiyi “təcavüzə”, İran vətəndaşlarının öldürülməsinə, həmçinin körpülərə, infrastruktura və qeyri-hərbi ərazilərə edilən hücumlara cavab olaraq həyata keçirilib.
İran ordusunun məlumatına görə, əməliyyatın 16-cı mərhələsi çərçivəsində Kemp Udairdə yerləşən ABŞ-ın sursat anbarına, həmçinin Əli Əl-Salim aviabazasındakı “Patriot” radarına və hava müşahidə radar sistemlərinə zərbələr endirilib.
Bəyanatda Kemp Udair ABŞ hərbçilərinin regiondakı ən mühüm bazalarından biri kimi təqdim olunur. Bildirilir ki, baza İran sərhədlərindən təxminən 104 kilometr məsafədə yerləşir və ABŞ qüvvələrinin dəstəklənməsi, eləcə də yenidən qruplaşdırılması üçün əsas mərkəzlərdən biridir. İran ordusu qeyd edib ki, bu bazanın sıradan çıxarılması regionda ABŞ-ın hərbi dəstək əməliyyatlarına ciddi təsir göstərə bilər.
Ordu həmçinin Əli Əl-Salim aviabazasını ABŞ-ın əsas hava nəqliyyatı mərkəzi və Qərbi Asiyada hərbi qüvvələrin yerləşdirilməsi üçün əsas keçid nöqtəsi adlandırıb. Bildirilib ki, bu baza Vaşinqtonun regiondakı hərbi və logistika strategiyasında mühüm rol oynayır.