Cəmiyyətin əksəriyyətinin dayandığı yerdə dayanmağı bacarmırsansa, bu o deməkdir ki, xalqın maraqlarına uyğun deyil, yalnız tapşırıqlarla hərəkət edirsən – bu haqda Gürcüstanın Baş naziri İrakli Kobaxidze jurnalistlərə deyib.

Kobaxidzeyə Gürcüstanın Prezidenti Salome Zurabişvilinin imzalamadığı “Ailə dəyərləri və yetkinlik yaşına çatmayanların müdafiəsi haqqında” qanunla bağlı sual verilib.

O, Salome Zurabişvili və müxalifətin LGBT təbliğatının tərəfini tutduqlarını bildirib.

“Salome Zurabişvili, eləcə də bütün radikal müxalifət LGBT təbliğatının tərəfini tutdu. Bu onların seçimidir. Daha doğrusu, bu, onların seçimi deyil, onların tapşırığıdır. Təsəvvür edin, indi seçki dövrüdür və hamı çox yaxşı bilir ki, ictimaiyyətin 90 faizindən çoxu bu qanunu dəstəkləyir. Son sorğuda bu qanuna 92 ​​faiz dəstək qeydə alındı. Bunu hamı çox yaxşı bilir. Əgər belə bir vaxtda da cəmiyyətin əksəriyyətinin dayandığı yerdə dayanmağı bacarmırsansa , bu o deməkdir ki, xalqın maraqlarına uyğun deyil, yalnız tapşırıqlarla hərəkət edirsən” – İrakli Kobaxidze bildirib.

Salome Zurabişvilinin imzalamadığı “Ailə dəyərləri və yetkinlik yaşına çatmayanların müdafiəsi haqqında” qanunu bu gün Gürcüstan Parlamentinin sədri Şalva Papuaşvili imzalayıb.