Hökumət Gürcüstanın milli və demoqrafik maraqlarını tam şəkildə qoruyacaq və yalnız bu şərtlərdə həyata keçiriləcək bütün layihələr Gürcüstanın iqtisadi inkişafına və ölkə əhalisinin rifahının artmasına xidmət edəcək. Bunu Gürcüstanın Baş naziri İrakli Kobaxidze bəyan edib.

Baş nazirin sözlərinə görə, hökumət “Eagle Hills” ilə imzalanmış müqavilənin prinsipial məsələləri ilə bağlı bütün suallara cavab verməyə hazırdır və baş plan qanunla nəzərdə tutulmuş prosedurlara uyğun şəkildə, şəffaf formada təsdiqlənəcək.

“Qeyd olunan müqaviləyə kommersiya sirri statusunun verilməsi, bir tərəfdən, Gürcüstan qanunvericiliyinə, digər tərəfdən isə beynəlxalq təcrübəyə əsaslanır. Dövlətin öz vətəndaşlarından gizlədəcəyi heç nə yoxdur və müqavilə ilə bağlı bütün suallara cavab verməyə hazırdır. Lakin istənilən kommersiya şirkətinin marağındadır ki, gələcəkdə digər potensial tərəfdaşlarla danışıqlar aparmaq üçün daha geniş imkanlara sahib olmaq məqsədilə müqavilənin detallarının məxfi qalması təmin edilsin. Məhz bu, müqaviləyə kommersiya sirri statusunun verilməsinin yeganə səbəbidir. Bunu bəzi partiyaların biznesmen rəhbərləri yaxşı bilirlər, lakin onların partiyası yenə də bu mövzudan sui-istifadə edir. Belə hallarda xarici agentin necə ağır taleyi olduğunu xatırlamamaq mümkün deyil. Bir daha təkrar edirəm – müqavilənin bütün prinsipial məsələləri ilə bağlı istənilən suala cavab verməyə hazırıq. Baş plana gəlincə, o, İqtisadiyyat Nazirliyi və müvafiq bələdiyyələr tərəfindən qanunla müəyyən edilmiş bütün standart prosedurlara tam uyğun şəkildə, şəffaf olaraq təsdiqlənəcək.

Üç il əvvəl Gürcüstanın “rusifikasiyası” və milli təhlükəsizliyin zəifləməsi ilə bağlı başlanmış saxta ksenofobik kampaniyanı xatırlatmaq istəyirəm. O zaman biz əhaliyə bildirdik ki, hər şey dövlətin nəzarəti altındadır və nə Gürcüstanın “rusifikasiyası” baş verəcək, nə də ölkənin milli maraqları təhlükəyə düşəcək. Bu gün, üç il sonra, hamı aydın şəkildə görür ki, həmin dövrdə bir çox vicdanlı vətəndaşı çaşdıran xarici agentlərin saxta panikası heç bir real əsas daşımırdı və hökumət öz sözünü tam şəkildə yerinə yetirdi.

Bu gün də vətəndaşlarımıza eyni şeyi vəd edirik. Hökumət Gürcüstanın milli və demoqrafik maraqlarını tam şəkildə qoruyacaq və yalnız bu şərtlərdə həyata keçiriləcək bütün layihələr Gürcüstanın iqtisadi inkişafına və ölkə əhalisinin rifahına töhfə verəcək,” – deyə Baş nazir bildirib.