Gürcüstan əsgəri adını daşımaq eyni zamanda ən böyük şərəf və böyük məsuliyyətdir. Bu statusu ləyaqətlə daşımaq böyük zəhmət və fədakarlıq tələb edir. Məhz buna görə də Gürcüstan əsgəri xalqın etimadı və sevgisinə layiqdir – bu barədə Gürcüstanın Baş naziri İrakli Kobaxidze Vazianidə, Gürcüstan Müdafiə Qüvvələrinin yaradılmasının 34-cü ildönümü ilə əlaqədar tədbirdə çıxışı zamanı bildirib.

Hökumət başçısı əsgərlərə göstərdikləri şücaət və vətənə xidmətlərinə görə təşəkkürünü bildirib.

“Ölkəmizin Müdafiə Qüvvələrinin bütün heyətini, qürur mənbəyimiz olan ordumuzu, vətənimizin əsl vətənpərvərlərini salamlayıram. Sizi bu gün – Gürcüstan Müdafiə Qüvvələrinin yaradılmasının 34-cü ildönümü münasibətilə təbrik edirəm. Bu gün Gürcüstanın ən yeni tarixi üçün xüsusi gündür. Bu gün, müstəqilliyimizi və suverenliyimizi böyük qürurla nümayiş etdirdiyimiz gündür. Bu gün sizinlə birlikdə ölkəmizin dinc və parlaq gələcəyini qeyd edirik. Bu illər ərzində Gürcüstan Müdafiə Qüvvələrinin üzləşdiyi bir sıra mürəkkəb çağırışlar aşılıb.
Sizə söz verirəm ki, müdafiə qüvvələrimizin gücləndirilməsi, ölkəmizin irəliləməsi və inkişafı gələcəkdə də davam edəcək. Gürcüstan əsgəri adını daşımaq eyni zamanda ən böyük şərəf və böyük məsuliyyətdir. Bu statusu ləyaqətlə daşımaq böyük zəhmət və fədakarlıq tələb edir. Məhz buna görə də Gürcüstan əsgəri xalqın etimadı və sevgisinə layiqdir. Hər birinizə göstərdiyiniz şücaət və vətənə xidmətiniz üçün təşəkkür edirəm. Hərbçilərimizin bütün döyüş uğurları qətiyyətin, iradənin və döyüş ruhunun təzahürünün çoxsaylı nümunələrini birləşdirir. Sizin ləyaqətinizi, peşəkarlığınızı və fədakarlığınızı Gürcüstanda və onun hüdudlarından kənarda hamı yekdilliklə tanıyır” – baş nazir bildirib.