İrakli Kobaxidze Antaliya Diplomatiya Forumu çərçivəsində keçirilən “Gələcəyin müəyyən edilməsi və risklərin idarə olunması” adlı liderlər panelində çıxışı zamanı bildirib ki, Gürcüstanın suverenliyinin, müstəqilliyinin və milli maraqlarının qorunmasında əsas vasitə həmişə diplomatiya olub və buna görə də ölkə diplomatiyaya və onun roluna inanır.

Onun sözlərinə görə, Gürcüstan 23 əsrlik tarixə malikdir və bu dövr ərzində çox mürəkkəb geosiyasi mühitdə, imperiyaların kəsişməsində mövcud olub.

İrakli Kobaxidze qeyd edib: “Əvvəla, diplomatiyadan danışarkən vurğulamalıyam ki, Gürcüstan 23 əsrlik tarixə malikdir. Buna görə də diplomatiya bizim genetik kodumuzdadır. Bu 23 əsr ərzində biz çox çətin geosiyasi mühitdə, imperiyaların kəsişməsində yaşamaq məcburiyyətində qalmışıq. O imperiyaların bir çoxu bu gün artıq mövcud deyil, amma Gürcüstan sağ qalıb.”

O bildirib ki, ölkənin suverenliyinin və milli maraqlarının qorunmasında əsas alət diplomatiya olub və Gürcüstanın buna görə diplomatiyaya inamı var.

İrakli Kobaxidze əlavə edib ki, müstəqilliyin bərpasından sonra Gürcüstan səhvlər də edib, çünki o dövrdə kifayət qədər diplomatik və praqmatik yanaşma olmaya bilərdi. Lakin ölkə bu təcrübədən nəticə çıxarıb və daha diplomatik, praqmatik yanaşma formalaşdırıb ki, bu da sülh və sabitliyin qorunmasına xidmət edir.

Onun fikrincə, bütün dövlətlər problemlərin həllində diplomatik çıxış yollarına üstünlük verməlidir, lakin hazırda dünyada sərt siyasi maraqlar diplomatiyanı üstələyir və bu vəziyyət dəyişməlidir.