Bu gün ölkəmizə misli görünməmiş, altı milyard dollar həcmində investisiya qoyulmasını nəzərdə tutan memorandum imzaladıq – bu haqda baş nazir İrakli Kobaxidze Əbu-Dabidə gürcü jurnalistlərə bildirib.

O, bu razılaşmanın Gürcüstanın iqtisadi inkişafı üçün xüsusi əhəmiyyət kəsb edəcəyini deyib.

“Birləşmiş Ərəb Əmirliklərində çox maraqlı görüşlərimiz oldu. İlk növbədə Birləşmiş Ərəb Əmirliklərinin Prezidenti, Əbu-Dabinin idarəçisi ilə görüşümüz oldu, eləcə də nazirlər və hökumət üzvləri ilə çox maraqlı görüşlərimiz oldu. Biz ölkələr arasında münasibətlərin müxtəlif aspektlərini, siyasi əməkdaşlığı müzakirə etdik və iqtisadi layihələrlə bağlı çoxlu müzakirələr apardıq. İki ölkə arasında əməkdaşlığı daha da dərinləşdirə biləcəyimiz konkret, çox maraqlı istiqamətlər müəyyən edildi. Xüsusilə vacibdir ki, bu gün ölkəmizə misli görünməmiş investisiya qoyulmasını nəzərdə tutan memorandum imzaladıq, bu altı milyard dollar həcmində investisiyadır və bu sərmayəni investisiya sektorunda müstəsna təcrübəyə malik şirkət, tanınmış EMAAR Qrupu Gürcüstanda həyata keçirəcək. Çox maraqlı layihə həyata keçiriləcək, bu, çoxfunksiyalı inkişaf layihəsidir, bir tərəfdən Tbilisidə, digər tərəfdən Batumidə, Qonioda çoxfunksiyalı infrastruktur inkişaf etdiriləcək” – baş nazir bildirib.

İrakli Kobaxidzenin bəyanatına əsasən, bütün bunlar ölkə iqtisadiyyatının inkişafına əhəmiyyətli töhfə verəcək, iqtisadi artım tempini daha da sürətləndirəcək, yeni iş yerləri yaranacaq və bütün bunlar ölkəyə digər investorları daha da cəlb edəcək.

“Tərəfdaşlarımıza, dostlarımıza, Birləşmiş Ərəb Əmirlikləri hakimiyyətinə və EMAAR Qrupa, onun rəhbəri cənab Alabara, hamıya əməkdaşlığa və ölkəmizin iqtisadi inkişafı üçün xüsusi əhəmiyyət kəsb edəcək bugünkü razılaşmaya görə xüsusilə təşəkkür etmək istərdim – baş nazir bildirib.