Didqoroba gürcü xalqının sarsılmaz ruhunun, birliyinin və qələbəsinin rəmzidir. Hər bir xalqın tarixində onun gələcəyini əsaslı şəkildə müəyyən edən tarixlər mövcuddur. 1121-ci il 12 avqust bizim üçün məhz belə bir tarixdir, – bunu Gürcüstanın baş naziri İrakli Kobaxidze Didqoroba bayramı münasibətilə keçirilən tədbirdə çıxışı zamanı bildirib.

Baş nazirin sözlərinə görə, bu, gürcü dövlətçiliyi ideyasının və eyni zamanda xristian dəyərlərinin yekun qələbəsi idi.

“Bu gün tariximizin ən parlaq günlərindən biri – Didqorobanı qeyd edirik. Bu gün gürcü xalqının sarsılmaz ruhunun, birliyinin və qələbəsinin rəmzidir. Hər bir xalqın tarixində onun gələcəyini əsaslı şəkildə müəyyən edən tarixlər mövcuddur. 1121-ci il 12 avqust bizim üçün məhz belə bir tarixdir. Bu, təkcə döyüşdə qələbə deyildi; bu, gürcü dövlətçiliyi ideyasının və eyni zamanda bütün mədəniyyətimizin və tariximizin əsasını təşkil edən xristian dəyərlərinin yekun qələbəsi idi. Sayca bərabər olmayan müharibədə Davit Ağmaşenebelin strateji baxışı, döyüşçülərin fədakarlığı və xalqın birliyi “möcüzəvi qələbə” yaratdı ki, bu da ölkəmizə azadlıq qazandırmaqla yanaşı, Gürcüstanın Qızıl dövrünün – siyasi, iqtisadi, mədəni və təhsil yüksəlişinin təməlini qoydu və ölkəmizi regionun ən güclü dövlətinə çevirdi”, – deyə baş nazir bildirib.

Hökumət rəhbərinin sözlərinə görə, bu gün gürcü xalqının müasir Didqorisi ölkənin tam birləşməsi və suverenliyinin möhkəmləndirilməsi uğrunda mübarizədir.

“Didqorinin əsas dərsi bütün nəsillər üçün dəyişməzdir – xalq ümumi məqsəd uğrunda birləşəndə, öz həqiqətinə inananda və ləyaqətli bir rəhbərə sahib olanda onun üçün keçilməz maneə yoxdur. Bu gün, çağırışlarla dolu dünyada, məhz bunu bizə müqəddəs atamızın müdrik sözləri xatırladır: ‘Didqori hələ də qazanılmalıdır.’ Bu gün bizim müasir Didqorimiz ölkənin tam birləşməsi və suverenliyinin möhkəmləndirilməsi uğrunda mübarizədir; bu gün də biz ölkəmizin müstəqilliyini möhkəmləndirmək, həmçinin təkcə bizim kimliyimizin deyil, bütün Avropa sivilizasiyasının əsası olmuş və olmaqda davam edən xristian dəyərlərini qorumaq üçün mübarizə aparırıq. Bu mübarizə bizdən doqquz əsr əvvəl böyük əcdadlarımızın göstərdiyi eyni birliyi, müdrikliyi və vətənə sədaqəti tələb edir. Əminəm ki, birliyimiz və bu ruh yüksəkliyi ilə biz mütləq tarixi məqsədimizə nail olacağıq. Didqoroba bayramınız mübarək olsun”, – deyə baş nazir bildirib.