Gürcüstanın Baş naziri və “Gürcü Arzusu”nun Siyasi Şurasının sədri Irakli Kobakhidze partiyanın mərkəzi ofisində keçirilən brifinqdə bildirib ki, Böyük Britaniyanın iki aparıcı gürcü yayımçıya sanksiya tətbiq etməsi azad mediaya açıq hücumun presedentsiz nümunəsidir. Onun sözlərinə görə, bu fakt bir tərəfdən faciəvi, digər tərəfdən isə tətbiq edilən sanksiyanın rəsmi əsaslandırmasına görə komikdir.

Kobaxidzenin fikrincə, azad gürcü mediasına hücumun real motivi nüfuzdan düşmüş, “canlı-meyit” vəziyyətində olan müxalifətə siyasi nəfəs vermək cəhdidir. O bildirib ki, xarici qüvvələr bir tərəfdə gürcü xalqına xidmət edən və son iki ildə iki dəfə xalqın möhkəm etimadını qazanmış “Gürcü Arzusu”nu, digər tərəfdə isə xarici güclərə xidmət edən radikal müxalifəti görürlər.

Baş nazir qeyd edib ki, heç bir sanksiya milli yayımçını həqiqəti deməkdən və cəmiyyəti məlumatlandırmaqdan imtina etməyə məcbur edə bilməz. Onun sözlərinə görə, Gürcüstanda doğru söz susdurula bilməz.

Kobaxidze həmçinin bildirib ki, bəzi radikal müxalifət nümayəndələri xarici qüvvələrin dəstəyinə ümid edirlər və ölkənin taleyinin gürcü xalqı tərəfindən deyil, kənar güclər tərəfindən müəyyənləşdirilməsini istəyirlər. O, bu qüvvələri “dərin dövlət”, “qlobal müharibə partiyası” və ya oliqarx ailələr kimi xarakterizə edib və onların Avropa bürokratiyasında qeyri-formal təsirə malik olduğunu iddia edib.

Baş nazir ABŞ-la bağlı da danışaraq qeyd edib ki, prezident Donald Trump tərəfindən elan olunmuş “dərin dövlət”ə qarşı mübarizənin uğurla nəticələnəcəyinə ümid edir və bunun göstəricisinin ABŞ administrasiyasının Gürcüstana münasibətində dəyişiklik olacağını bildirib.

Sonda Kobaxidze vurğulayıb ki, son günlərdə baş verən hadisələr göstərdi ki, hansı siyasi qüvvə gürcü xalqının legitim dəstəyinə malikdir və kim hakimiyyətə yalnız xarici himayədarların maraqlarına xidmət etmək üçün gəlmək istəyir.