İrakli Ğaribaşvili ABŞ dövlət katibinin Avropa və Avrasiya məsələləri üzrə köməkçisi Karen Donfrid ilə görüşüb

ABŞ-ın Gürcüstana güclü dəstəyi, iki ölkə arasında strateji tərəfdaşlıq, Avropa və Avro-Atlantik strukturlara inteqrasiya Gürcüstanın baş naziri İrakli Ğaribaşvili ilə ABŞ dövlət katibinin Avropa və Avrasiya məsələləri üzrə köməkçisi Karen Donfridin görüşündə əsas mövzular olub.

Hökumət başçısı qeyd edib ki, dövlət katibinin köməkçisinin səfəri ABŞ-ın Gürcüstana sarsılmaz dəstəyinin növbəti bariz mesajıdır və ölkə bunu xüsusilə yüksək qiymətləndirir.

Onun sözlərinə görə, Gürcüstan ABŞ-ın həm regionda, həm də xaricdə ən etibarlı və sadiq müttəfiqidir və belə olaraq qalır. Gürcüstan-ABŞ strateji tərəfdaşlığının, o cümlədən Gürcüstan-ABŞ yüksək səviyyəli siyasi dialoqunun intensivləşdirilməsi yolu ilə, eləcə də müdafiə və təhlükəsizlik, ticarət-iqtisadi və investisiya sahələrində daha da gücləndirilməsinin vacibliyi vurğulanıb.

Baş nazirlə görüşdə ABŞ-ın Gürcüstanın ərazi bütövlüyü və suverenliyinə, eləcə də Avropa və Avro-Atlantik istəklərinə sarsılmaz və qəti dəstəyi bir daha vurğulanıb.

Hökumət başçısının sözlərinə görə, Gürcüstan hökumətinin və gürcü xalqının ölkəni Avropa və Avro-Atlantik strukturlara inteqrasiya etmək iradəsi sarsılmazdır. Bundan əlavə, tərəflər Ukraynada davam edən hərbi əməliyyatları müzakirə ediblər. Söhbətdə regiondakı vəziyyət və Gürcüstanın regionda sülh və sabitliyin təmin edilməsində mühüm rolu müzakirə edilib.

Hökumət Aparatında keçirilən görüşdə Amerika Birləşmiş Ştatlarının fövqəladə və səlahiyyətli səfiri Kelli Deqnan, Gürcüstanın xarici işlər naziri İlia Darçiaşvili və hökumət administrasiyasının rəhbəri Revaz Cavelidze iştirak ediblər.

Məlumatı baş nazirin mətbuat xidməti yayıb.