Gürcüstanın müdafiə naziri və baş nazirin müavini İrakli Çixovani Türkiyənin müdafiə naziri ilə telefonla danışıb.

Müdafiə Nazirliyinin məlumatına görə, telefon danışığı zamanı İrakli Çixovani Gürcüstan–Azərbaycan sərhədi yaxınlığında bu gün Türkiyə Hərbi Hava Qüvvələrinə məxsus hərbi-nəqliyyat təyyarəsinin qəzaya uğraması ilə bağlı dərin kədərini bildirib.

Müdafiə naziri türk həmkarına Gürcüstan Müdafiə Nazirliyi adından başsağlığı verib, həlak olanların ailələrinə və yaxınlarına, Türkiyə Silahlı Qüvvələrinə və qardaş türk xalqına başsağlığı çatdırıb.

Daxili İşlər Nazirliyinin məlumatına əsasən, Siğnaği bələdiyyəsində, Gürcüstan sərhədindən təxminən 5 kilometr məsafədə Türkiyəyə məxsus hərbi təyyarə qəzaya uğrayıb. Təyyarə Azərbaycan–Türkiyə istiqamətində uçuş həyata keçirirdi.

Bundan əlavə, “Sakaeronavigatsia”nın yaydığı məlumatda qeyd olunur ki, Türkiyənin “C-130” tipli hərbi təyyarəsi Gürcüstan ərazisini keçdikdən bir neçə dəqiqə sonra, həyəcan siqnalı göndərmədən radarlardan itib və bundan sonra axtarış-xilasetmə işləri başlanıb.

Türkiyənin Müdafiə Nazirliyi təsdiqləyib ki, Gürcüstan–Azərbaycan sərhədi yaxınlığında Türkiyənin “C-130” tipli hərbi-nəqliyyat təyyarəsi qəzaya uğrayıb.

Məlumata görə, təyyarənin göyərtəsində 20 hərbi qulluqçu olub.