Azərbaycan Prezidenti İlham Əliyev bildirir ki, “Dərin dövlət”in nümayəndələri 2020-ci ilin seçkilərini saxtalaşdırmaq nəticəsində Donald Trampın qələbəsini əlindən alıblar. Bu barədə Əliyev “Al Arabiya” telekanalına müsahibəsində deyib.

Əliyevin qeyd etdiyi kimi, Donald Tramp prezident vəzifəsində olduğu bir neçə ay ərzində “Afrikada, Asiyada, Cənubi Qafqazda möcüzə yaradıb”.

Əliyev Ermənistanın lideri ilə birlikdə prezident Trampın Nobel Sülh Mükafatına namizədliyini irəli sürdüyünü təsdiqləyib.

“O, həqiqətən böyük etimada layiq insandır. Bu, mənim onunla ilk görüşüm idi, lakin siyasətçi kimi ona münasibətim həmişə müsbət olub. Hətta onun ilk prezidentlik dövründə belə. Baxmayaraq ki, o vaxt görüşmək imkanımız olmayıb və xüsusən “Dərin dövlət”in nümayəndələri tərəfindən seçkilərin saxtalaşdırılması nəticəsində yenidən seçilmək imkanından məhrum olanda. Onlar onun qələbəsini əlindən aldılar. Cənab Trampın poçtla səsvermə praktikasının ləğvi barədə dedikləri tamamilə düzgündür. Bilirsiniz, Amerika administrasiyaları həmişə bütün dünyaya necə yaşamalı, demokratiyanı necə qurmalı, seçkiləri necə keçirmələri barədə ağıl öyrətməyi xoşlayır. Bunu biz hamımız yaxşı bilirik. Lakin onlar özləri qələbəni onun əlindən almaqla, prezident Trampa qarşı ən böyük seçki saxtakarlığını törətdilər. Cənab Tramp prezident olmadığı müddətdə belə çox layiqli şəkildə hərəkət edirdi. Qurbağalarla dolu bütün bu bataqlıqların – “USAID”, “Azadlıq Radiosu”, “Washington Post”, “New York Times”, “Wall Street Journal”, “Newsweek” kimi saxta xəbərləri hazırlayanların hamısının ona qarşı olduğu Amerikaya qayıtmaqla o, böyük cəsarət və ləyaqət göstərdi. Məni necə iblisləşdirirdilərsə, onu da eləcə iblisləşdirirdilər. Bəlkə də eyni səviyyədə deyil, lakin eyni yolla – şayiələr yaymaqla” – Əliyev bildirib.

Azərbaycanın lideri bildirib ki, Donald Tramp böyük müqavimətlə üzləşir, çünki bütün sistem ona qarşıdır. “Prezident Tramp cəsur insan və böyük liderdir. Mən fəxr edirəm ki, o, mənə dost kimi davranır” – Əliyev deyib.