“Beynəlxalq hüquq demək olar ki, artıq işləmir, bir çox ölkə onu sadəcə nəzərə almayıb,” – bunu Azərbaycan Prezidenti İlham Əliyev Münhen Təhlükəsizlik Konfransında bildirib.

Prezident qeyd edib ki, yalnız beynəlxalq hüquqa istinad etmək öz problemlərini həll etmək üçün artıq kifayət deyil.

“Azərbaycanın nümunəsi bunu aydın şəkildə göstərir. Buna görə də yeni dünya düzəninin və ya dövlətlərarası münasibətlərin yeni sisteminin formalaşması qaçılmaz idi. Məsələ yalnız bu addımı kim atacaq sualı idi. Mən hesab edirəm ki, ABŞ Prezidenti Donald Tramp “Sülh Şurası”nın yaradılması təşəbbüsünü irəli sürdüyü zaman böyük iş gördü – bu institutun gələcəyi parlaqdır. Hər keçən gün daha çox ölkə anlayır ki, dövlətlərarası münasibətlərdə, təhlükəsizlik və beynəlxalq institutların fəaliyyətində yanaşmalarını yenidən nəzərdən keçirmək lazımdır. Biz görürük ki, BMT tamamilə iflicdir. O, artıq heç bir əhəmiyyətli məsələyə təsir göstərə bilmir, alternativ isə yoxdur. Buna görə də ümid edirəm ki, birgə işləyərkən daha çox sağlam məntiq ortaya çıxacaq, çünki yeni dünya düzəni güclünün haqlı olduğu anlamına gəlməməlidir. Yeni dünya düzəni sivilizasiyalı dünyanın, münasibətlərin və beynəlxalq qaydaların yeni mexanizmlərini nəzərdə tutmalıdır,” – deyə Əliyev bildirib.