Gürcüstanın Təhsil, Elm və Gənclər Nazirliyinin tabeliyində olan “Saqanmanaatleblo Resursebi” MMC 2026–2027-ci tədris ili üçün ibtidai sinif şagirdlərinin məktəb forması geyimlərinin satın alınması üzrə bazar araşdırması elan edib.

Müvafiq eskizlər də göstərilib və məktəb formasının dizaynının necə olacağı məlumdur.

Dövlət satınalmaları agentliyinin saytında yerləşdirilən məlumatlara əsasən, təchizat iki mərhələdə həyata keçiriləcək: birinci mərhələ – malların azı 30%-nin 2026-cı il 31 iyul tarixinədək çatdırılması; ikinci mərhələ – qalan malların 2026-cı il 20 avqust tarixinədək çatdırılması.

“Təchizatçı malların fasiləsiz çatdırılmasını təmin etməli, həmçinin daşınma və bununla bağlı təşkilati-texniki məsələləri öz hesabına həyata keçirməlidir; təchizatçı müqavilə bağlandıqdan sonra satınalan təşkilatla hər bir məhsulun modelini, rəngini, eləcə də brendləşməni (o cümlədən yazı, loqo, rəng, ölçülər və s.) və digər müvafiq detalları dəqiqləşdirməli və yalnız satınalan təşkilatın razılığı əsasında istehsala/tikişə başlamalıdır. Bazar araşdırmasında iştirak edən şəxs və ya onun subpodratçısı (istehsal fabriki) 2022-ci il 1 yanvardan bazar araşdırmasının bitdiyi günədək ən azı 5 000 000 (beş milyon) lari dəyərində geyim tikilişi və/və ya təchizatı və/və ya satış təcrübəsinə malik olmalıdır. Bunun təsdiqi üçün müqavilələr və həmin müqavilələr üzrə qəbul-təhvil aktları və ya təsdiqlənmiş hesab-fakturalar təqdim edilməlidir,” – “Saqanmanaatleblo Resursebi” MMC-nin ümumi tələbləri belədir.

Təkliflərin qəbuluna bu ilin 21 aprelində başlanacaq və 22 aprel saat 12:00-da başa çatacaq.