Gecə saatlarında inzibati qaydada saxlanılan şəxslərin bir hissəsi Tbilisinin ilkin saxlama təcridxanasına yerləşdirilib.

Onların hüquq müdafiəçiləri saxlanılan şəxsləri ziyarət etmək üçün oradadırlar. Vəkillər, saxlanılan şəxslərin bir hissəsində ağır xəsarətlərin qeydə alındığını bildirirlər. Həmçinin, Xüsusi İstintaq Xidmətinin nümayəndələri müvəqqəti saxlama təcridxanasındadırlar. Müstəntiqlər saxlanılan şəxsləri hüquq-mühafizə orqanlarının əməkdaşları tərəfindən yol verilən səhlənkarlıqlarla bağlı dindirəcəklər.

Bununla yanaşı, Tbilisinin Şəhər Məhkəməsində noyabrın 29-da Rustaveli prospektində saxlanılmış “Gürcüstan Naminə” partiyasının üzvü İrakli Tsulaianın və eyni aksiyada saxlanılmış daha bir şəxsin, İrakli Diasamidzenin işinə baxılır. Onların hər ikisinin üz nahiyəsində fiziki xəsarətlər qeydə alınır. Onların işinə hakim Zviad Tsekvava baxır.

Saxlanılan İrakli Diasamidzenin dediyi kimi, noyabrın 29-da xüsusi təyinatlılar Cicinadze küçəsində ona hücum ediblər və fiziki zorakılıq törədiblər. Tsulaianın yaxınları isə bildirirlər ki, “Gürcüstan Naminə” partiyasının üzvü oğlunu evə apardıqdan sonra aksiyaya qayıdarkən xüsusi təyinatlıların hücumuna məruz qalıb. Saxlanılan şəxslər inzibati xətada, xüsusən polisin qanuni tələbinə tabe olmamaqda ittiham olunurlar. Onlardan başqa, gün ərzində digər şəxslərin də inzibati işlərinin müzakirəsi nəzərdə tutulub.