“HEZBOLLAH” İsrailin şimalında, Livan sərhədi yaxınlığında yaşayan əhalini evakuasiyaya çağırır, İsraildə isə bildirirlər ki, israillilər sərhəd şəhərlərindən evakuasiya olunmağı planlaşdırmırlar

Livanın şiə qruplaşması “Hezbollah” İsrailin şimalında, Livan sərhədi yaxınlığında yaşayan əhalini dərhal evakuasiyaya çağırır.

“Şimal yaşayış məntəqələrinin sakinlərinə xəbərdarlıq: sizə sərhəddən beş kilometr radiusda yerləşən bütün yaşayış məntəqələrini tərk etmək əmri verilir”, – qruplaşmanın bəyanatında deyilir.

Bəyanata görə, “Hezbollah” İsrailin hərəkətlərinə cavab verməyi planlaşdırır.

“Ordunuzun Livanın suverenliyinə və vətəndaşların təhlükəsizliyinə qarşı aqressiyası, mülki infrastrukturun məhv edilməsi və həyata keçirdiyi qovma kampaniyası cavabsız qalmayacaq”, – “Hezbollah”ın bəyanatında deyilir.

Qruplaşmanın bəyanatına İsrail artıq cavab verib. İsraildə bildiriblər ki, israillilər sərhəd şəhərlərindən evakuasiya olunmağı planlaşdırmırlar.