Türkiyə Ukrayna və Rusiya arasında sülh danışıqlarına, həmçinin potensial liderlər sammitinə İstanbulda ev sahibliyi etməyə hazırdır. Bunu Türkiyənin xarici işlər naziri Hakan Fidan bəyan edib.

Fidanın sözlərinə görə, Türkiyə rəsmi şəkildə həm Ukraynaya, həm də Rusiyaya İstanbulda sülh danışıqlarının yeni raundunun keçirilməsini təklif edib və bu, “liderlərin sammitini də əhatə edə bilər”.

“Biz bir daha təsdiqləyirik ki, danışıqların dördüncü raunduna və mümkün liderlər sammitinə İstanbulda ev sahibliyi etməyə hazırıq,” – deyə Fidan bildirib.

Bununla yanaşı, o qeyd edib ki, Türkiyə hər iki tərəflə konstruktiv münasibətləri qoruyub saxlayır.

“Biz onların danışıqlar masasına qayıtmasına uğurla şərait yaratdıq. Dialoq və diplomatiya Türkiyənin xarici siyasətinin əsas dayağı olaraq qalacaq,” – deyə Fidan vurğulayıb.