Gürcüstanın basketbolçulardan ibarət yığması 2025-ci ilin Avropa Çempionatına bu gün İspaniya ilə oyunla başlayacaq. Bu, komandamızın “EuroBasket”də 30-cu oyunu olacaq. Birbaşa reportajı Gürcüstanın Birinci Kanalı və Birinci Kanal İdman sizə təqdim edəcək. Qarşılaşma Tbilisi vaxtı ilə saat 16:00-da başlayacaq.
“Xaçlılardan” nə gözləməliyik? 2022-ci ildə göstərdiyi nəticəni təkrarlayacaq və İspaniyanı məğlub edəcəkmi? Avropanın hazırkı çempionunu məğlub etmək nə dərəcədə realdır? İspaniyanın NBA-də cəmi bir basketbolçusu var, Gürcüstanın isə iki – bu, oyunun nəticəsinə təsir edəcəkmi?
Bu və digər suallara cavabı saat 16:00-dan etibarən alacağıq. Matçdan əvvəl, hətta Gürcüstanın yığmasının hazırlıq səviyyəsini qiymətləndirmək və bunun əsasında İspaniya ilə oyunun mənzərəsi barədə əvvəlcədən müzakirə aparmaq çox çətindir. Çox şey, Şenqelianın oynayıb-oynamayacağından asılı olacaq. Lakin onun keçmiş məşqçisi (“Virtus Bologna”da) və İspaniyanın yığmasının baş məşqçisi Serjio Skariolo başdan sona qədər bərabər mübarizə gözləyir.
Şenqelia oynayacaqmı?
Hazırlıq mərhələsinin əvvəlində Tornike Şenqeliada ürək aritmiyası qeydə alındı və iki həftə istirahət etməli oldu. Həkimlər ona məşq etməyə icazə versələr də, İspaniya ilə oynayıb-oynamayacağı tamamilə qeyri-müəyyən olaraq qalır.
“Bilirəm, sağlamlıq məsələm bir çox insanı narahat edirdi. Hamını sakitləşdirmək istəyirəm – Tanrıya şükürlər olsun, hər şeyə nəzarət edirik. Düzdür, hələ ideal vəziyyətdə deyiləm, lakin çalışıram maksimal şəkildə yaxşı hazırlaşım və komandaya real şəkildə kömək edə biləcək səviyyədə olum. Qısacası, hər şey sabitdir və irəliləyiş yavaş-yavaş hiss olunur.
Fiziki vəziyyətimə gəlincə, hər şey formaya nə qədər tez düşəcəyimdən asılıdır. Komandaya yük olmaq istəmirəm, çünki iki həftə ərzində məşq belə edə bilmirdim və İspaniya ilə oyuna qədər yalnız üç tam sessiya keçirmişəm”.
Məşqçilərin gözü ilə
Aleksandr Cikiç, Gürcüstanın yığmasının baş məşqçisi:
“Mübarizəyə hazırıq, “EuroBasket” başlayır və qarşıda bizi İspaniya ilə böyük qarşılaşma gözləyir. Tribunaya çoxlu gürcü azarkeş gözləyirəm.
Əlbəttə, çətinliklərimiz oldu, lakin bu, artıq keçmişdə qaldı. İndi biz yalnız gələcək və ilk matç haqqında düşünürük.
İspaniyanın zəif tərəfi demək olar ki, yoxdur, bu komanda təcrübəli və yüksək səviyyəli oyunçulardan komplektləşdirilib, hər bir komponentdə güclüdürlər və turnirin qalibi olmağa əsas favoritlərdən biridirlər. Lakin bu, üslubların qarşıdurması olacaq. Bizim də güclü tərəflərimiz var və inanıram ki, bu görünəcək” – Cikiç bildirib.
Serjio Skariolo, İspaniyanın yığmasının baş məşqçisi:
“Unutmamalıyıq ki, Gürcüstanın yığması artıq bir dəfə bizi məğlub edib. İndi də yaxşı komandadır. Xüsusilə güclü ön xətt oyunçuları var. Bizdən boy, eləcə də çəki baxımından üstündürlər. Buna görə də xüsusi səfərbərlik lazımdır ki, gürcüləri səbət altına buraxmayaq.
Onların yüksək səviyyəli NBA oyunçularına və çox yaxşı amerikalı oyunqurucusuna qarşı ağıllı oynamalıyıq. Cinahlarda da yaxşı basketbolçuları var. Gürcüstan çox təcrübəli komandadır, bir çox oyunçusu İspaniya çempionatını təmsil edir, onların arasında artıq əfsanəyə çevrilmiş Qiorqi Şermadini var.
Düşünürəm ki, bərabər oyun olacaq və ümid edirəm, bizim qələbəmizlə başa çatacaq”.
Əvvəlki qarşılaşmalar
Gürcüstanın yığması İspaniya ilə cəmi dörd dəfə qarşılaşıb. Hesab 3:1 rəqibin xeyrinədir. Bir qələbə 2022-ci ilə təsadüf edir, o vaxt Gürcüstan Dünya Çempionatının seçmə mərhələsində, “Tbilisi Arena”nın açılış oyununda o vaxtkı dünya çempionunu əlavə vaxtda məğlub etmişdi.
