Gürcüstanın Türkiyə Respublikasındakı fövqəladə və səlahiyyətli səfiri Arçil Kalandia Gürcüstan Parlamentinin sədri Şalva Papuaşvilinin Türkiyədə mənalı və səmərəli rəsmi səfər həyata keçirdiyini bildirir.

Arçil Kalandia bildirir ki, Türkiyənin ali qanunverici orqanının rəhbəri, eləcə də Xarici Əlaqələr Komitəsinin rəhbəri ilə görüş olub.

“Başqa vacib görüşlər də oldu, əminəm ki, yaxın gələcəkdə konkret nəticələr verəcək. Bizi Türkiyə ilə strateji tərəfdaşlıq bağlayır. Ən yüksək səviyyədə təmaslar dinamik şəkildə inkişaf edir. Yaxın gələcəkdə ticarət-iqtisadi, biznes əlaqələrin, eləcə də siyasi təmasların daha da dərinləşəcəyini və keyfiyyətcə yeni mərhələyə keçəcəyini gözləyirik. Bütövlükdə, səfər uğurlu idi və biz iki ölkə arasında ən yüksək səviyyədə mövcud dinamikanın qorunub saxlanacağına və daha da dərinləşəcəyinə böyük ümid bəsləyirik” – Arçil Kalandia bildirib.