Gürcüstanın parlament nümayəndə heyəti Braziliyada rəsmi səfərdədir və burada ilk görüşünü Braziliyanın Deputatlar Palatasının sədri Hüqo Mota ilə keçirib.

Parlamentin mətbuat xidmətinin məlumatına əsasən, görüşdə tərəflər ikitərəfli parlament əlaqələrinə nəzər salıblar və onların inkişafı məsələlərini müzakirə ediblər. İki ölkə arasında mövcud siyasi, iqtisadi və ticarət əlaqələri həmçinin söhbətin mövzusu olub.

“Təhsil sahəsində əməkdaşlığın dərinləşdirilməsinə və təcrübə mübadiləsinin əhəmiyyətinə xüsusi diqqət yetirilib. Parlament nümayəndə heyətinin üzvləri Braziliyanın Deputatlar Palatasının sədrinə Gürcüstanın işğal olunmuş bölgələrində mövcud vəziyyətlə bağlı məlumat veriblər və Gürcüstanın ərazi bütövlüyünə sarsılmaz dəstəyə görə Braziliya hakimiyyətinə təşəkkür ediblər.

Görüşün sonunda parlament nümayəndə heyətinin üzvləri Braziliyanın Deputatlar Palatasının sədrini Gürcüstana cavab səfərinə dəvət ediblər.

Parlamentin sədri plenar iclasda Gürcüstan nümayəndə heyətini braziliyalı deputatlara təqdim edib və onların səfərinin xüsusi əhəmiyyətini qeyd edib” – Gürcüstan Parlamentinin mətbuat xidməti tərəfindən yayılmış məlumatda deyilir.

Xarici Əlaqələr Komitəsinin sədri Nikoloz Samxaradze parlament nümayəndə heyətinə rəhbərlik edir. Gürcüstan-Braziliya Dostluq Qrupunun rəhbəri, Təhsil, Elm və Gənclik İşləri Komitəsinin sədri Mariam Laşxi və İdman Komitəsinin sədri Viktor Sanikidze, həmçinin Gürcüstanın Braziliyadakı səfiri Zurab Mcedlişvili nümayəndə heyətinin tərkibindədir.