Gürcüstanın Müdafiə Nazirliyində publik hüquqi şəxs Kibertəhlükəsizlik Bürosunun və Azərbaycan Kibertəhlükəsizlik Xidmətinin nümayəndələrinin görüşü keçirilib.

Kibertəhlükəsizlik Bürosunun rəhbəri Luka Mqeladze Azərbaycan nümayəndə heyətinin nümayəndələrini büronun strukturu və məqsədləri ilə tanış edib, cari və planlaşdırılan layihələrdən danışıb.

Azərbaycan Kibertəhlükəsizlik Xidmətinin rəisi, vitse-polkovnik Elşən Həsənov Azərbaycanın müvafiq xidmətinin fəaliyyəti haqqında danışıb. Tərəflər kibertəhlükəsizlik sahəsində ikitərəfli əməkdaşlığı daha da dərinləşdirmək barədə razılığa gəliblər.

Səfər çərçivəsində Azərbaycan nümayəndə heyətinin nümayəndələri Davit Ağmaşenebeli adına Gürcüstanın Milli Müdafiə Akademiyasında olublar və informatika üzrə bakalavr proqramının kursantları ilə görüşüblər.

Nümayəndə heyətinin üzvləri Şindisi Memorialını da ziyarət edərək qəhrəmanların xatirəsini ehtiramla yad ediblər. Kibertəhlükəsizlik Xidmətinin nümayəndələri arasında görüş ikitərəfli əməkdaşlıq planı çərçivəsində üçüncü dəfə keçirilib.