Gürcüstanın Xarici İşlər Nazirliyi ATƏT-in fəaliyyətdə olan sədri kimi Finlandiya Respublikasının xarici işlər naziri Elina Valtonenin Gürcüstana səfəri ilə bağlı narahatlığını ifadə edir və ATƏT-in Katibliyinə və iştirakçı ölkələrə etiraz notası ilə müraciət edir – bu haqda Xarici İşlər Nazirliyindən Birinci Kanala açıqlayıblar.

Xarici İşlər Nazirliyi ATƏT-in Katibliyinə göndərilmiş notada qeyd edir ki, Gürcüstana rəsmi səfərlə nəzərdə tutulmuş proqramdan başqa, nazir Elina Valtonen hökumət əleyhinə fəalların kiçik qrupu tərəfindən təşkil olunmuş küçə aksiyasına qoşuldu və Gürcüstanda mövcud vəziyyətlə bağlı beynəlxalq ictimaiyyətin çaşdırılması cəhdi olan bəyanat verdi.

“Gürcüstanın Avstriya Respublikasındakı səfirliyi və ATƏT və Vyana şəhərindəki digər beynəlxalq təşkilatlardakı Daimi Nümayəndəliyi ATƏT-in Katibliyinə dərin hörmətini ifadə edir və ATƏT-in fəaliyyətdə olan sədri kimi Finlandiya Respublikasının xarici işlər naziri Elina Valtonenin Gürcüstana səfəri ilə bağlı Gürcüstan hökumətinin narahatlığını ifadə etməkdən şərəf duyur.

ATƏT-in fəaliyyətdə olan sədrinin Gürcüstanın xarici işlər naziri Maka Bocorişvili ilə görüşü, işğal xəttinə səfəri və vətəndaş cəmiyyətinin bir neçə nümayəndəsi ilə görüşünü əhatə edən proqramından başqa, nazir Elina Valtonen oktyabrın 14-də sərbəst şəkildə, lakin qanunsuz olaraq Tbilisinin əsas prospektini bağlayan hökumət əleyhinə fəalların kiçik qrupu tərəfindən təşkil olunmuş küçə aksiyasına qoşuldu. Nazir Valtonen tərəfindən verilən və reallığı əks etdirməyən açıq bəyanat Gürcüstanda mövcud vəziyyətlə bağlı beynəlxalq ictimaiyyəti şüurlu şəkildə çaşdırmaq cəhdidir.

Bu hərəkətlər ATƏT çərçivəsində əməkdaşlıq ruhuna ziddir və sədr mandatından sui-istifadə kimi hesab edilə bilər, bu isə etimad və gözlənilən neytrallığa zərər vurur.

Bu hərəkətlər Helsinki Yekun Aktında, BMT-nin A/RES/20/213 qətnaməsində, ATƏT-in qayda və prosedurlarında əksini tapan suverenliyə hörmət və daxili işlərə qarışmamaq da daxil olmaqla, beynəlxalq hüququn hamı tərəfindən tanınmış prinsipləri ilə bir araya sığmır və Diplomatik Münasibətlər üzrə Vyana Konvensiyasının ruhuna ziddir” – Gürcüstanın Xarici İşlər Nazirliyinin notasında qeyd olunub.