Gürcüstan Xarici İşlər Nazirliyi – İşğal olunmuş Sxinvali regionunda keçirilən qondarma “seçkilər” işğalçı rejimə legitimlik qazandıra bilməz və Sxinvali regionunun Gürcüstanın ayrılmaz hissəsi kimi statusunu dəyişdirə bilməz
Gürcüstan Xarici İşlər Nazirliyi işğal olunmuş Sxinvali regionunda qondarma prezident seçkilərinin keçirilməsi ilə bağlı açıqlama yayıb.
Nazirliyin bəyanatında bildirilir ki, qurum sözügedən qondarma seçkiləri pisləyir və onların keçirilməsinin beynəlxalq hüququn fundamental norma və prinsiplərinə zidd olduğunu qeyd edir.
“Gürcüstan Xarici İşlər Nazirliyi 2026-cı il sentyabrın 18-də işğal olunmuş Sxinvali regionunda keçirilmiş qondarma prezident seçkilərini pisləyir.
Bu qondarma seçkilərin keçirilməsi beynəlxalq hüququn fundamental norma və prinsiplərinə ziddir. Bu seçkilər işğalçı rejimə legitimlik qazandıra bilməz və Sxinvali regionunun Gürcüstanın ayrılmaz hissəsi kimi beynəlxalq hüquqi statusunu dəyişdirə bilməz.
Gürcüstanın işğal olunmuş ərazilərində, Rusiya Federasiyasının hərbi işğalı və effektiv nəzarəti şəraitində keçirilən istənilən qondarma seçki, məcburi köçkünlərin və qaçqınların öz evlərinə təhlükəsiz və ləyaqətli şəkildə qayıtmaq imkanından məhrum edildiyi bir şəraitdə, qanunsuzdur və hər hansı beynəlxalq hüquqi nəticə doğura bilməz.
Gürcüstan Xarici İşlər Nazirliyi həmçinin Rusiya Federasiyasının 2026-cı il sentyabrın 18-dən 20-dək işğal olunmuş Abxaziya və Sxinvali regionlarında Rusiya Federasiyası Dövlət Dumasına seçkilərin keçirilməsi barədə qərarını qətiyyətlə pisləyir.
Gürcüstan hökumətinin razılığı olmadan Gürcüstanın suveren ərazisində Rusiya Federasiyasının seçki məntəqələrinin açılması və fəaliyyət göstərməsi Gürcüstanın suverenliyinin və ərazi bütövlüyünün növbəti kobud şəkildə pozulmasıdır və Rusiya Federasiyasının Gürcüstanın regionlarının faktiki ilhaqına yönəlmiş siyasətinin daha bir açıq təzahürüdür.
Gürcüstan Xarici İşlər Nazirliyi beynəlxalq ictimaiyyəti Rusiya Federasiyasının bu qanunsuz əməllərinə lazımi qiymət verməyə və onları qətiyyətlə pisləməyə, həmçinin müvafiq beynəlxalq hüquqi və siyasi tədbirlərin görülməsini təmin etməyə çağırır.
Gürcüstan bir daha beynəlxalq ictimaiyyəti beynəlxalq səviyyədə tanınmış sərhədləri çərçivəsində Gürcüstanın suverenliyini və ərazi bütövlüyünü qətiyyətlə müdafiə etməyə və münaqişənin sülh yolu ilə həllinə dəstək verməyə çağırır”, – deyə Xarici İşlər Nazirliyinin bəyanatında qeyd olunur.