Gürcüstan Səhiyyə Nazirliyi sosial baxımdan həssas ailələrin bazasının yenidən yoxlanışına başlayır. Nazirlik bildirir ki, “bazada hələ də həmin şəxslər və ailələr qeydiyyatda qalır ki, artıq sosial yardım almağa ehtiyacları yoxdur.”
Gürcüstan Səhiyyə Nazirliyi sosial baxımdan həssas ailələrin bazasının yenidən yoxlanışına başlayır. Bu barədə nazir Mikheil Sarjveladze brifinq zamanı məlumat verib.
Nazirin sözlərinə görə, bazada hələ də həmin şəxslər və ailələr qeydiyyatda qalır ki, artıq sosial yardım almağa ehtiyacları yoxdur. Hazırda sosial baxımdan həssas ailələrin vahid bazasında 185 mindən çox ailə, onların isə ümumilikdə 710 min üzvü qeydiyyatdadır. Ailələrin yarısından çoxu maddi yardım almır, lakin əksəriyyəti nəzərdə tutulan digər güzəştlərdən faydalanır.
Sarjveladze bildirib ki, vahid baza vaxtilə siyasi spekulyasiyaların obyekti olub. 2012-ci ildən bəri maddi yardım üçün tələb olunan xal sistemi iki dəfə artıb, əks halda daha zəngin ailələr də yardım almış olardı.
Pandemiya dövründə və digər obyektiv və subyektiv səbəblər nəticəsində yoxlamalar dayanmışdı, bu da bəzi ailələrin artıq ehtiyac duymamalarına baxmayaraq bazada qalmasına gətirib çıxarıb. Nazir nümunələr göstərib: bəzi ailələr son üç ayda on minlərlə larilıq gəlir əldə edib, bəziləri isə bir ildə bir neçə avtomobil alıb, amma hələ də sosial yardım alırlar.
“Fakt budur ki, sosial baxımdan həssas ailələrin məlumat bazası ölkənin iqtisadi inkişafı ilə uyğun gəlmirdi. Bu isə spekulyasiyalara və yanlış təəssürat yaratmağa şərait yaradıb. Vaxtı çatıb ki, bu cür siyasi spekulyasiyalara son qoyulsun. Sosial Xidmətlər Agentliyi bazadakı əhali üzərində aktiv yoxlama prosesinə başlayır. Məqsədimiz odur ki, bazada yalnız həqiqətən dövlət maliyyə yardımı almağa layiq şəxslər qalsın,” – deyə Sarjveladze qeyd edib.
