Gürcüstanın İsraildəki səfirliyi İsrailin hava məkanının açılması ilə bağlı İsrailin hava limanlarının rəhbərliyinin bəyanatını yayır.

“İsrailin hava məkanının açılması ilə bağlı artan maraqdan irəli gələrək, İsrailin Daxili Cəbhə Komandanlığı tərəfindən verilmiş razılıq nəticəsində İsrailin hava limanlarının rəhbərliyi bəyan edir:

Ben Qurion və Haifa hava limanları tam gücü ilə fəaliyyətə qayıdır!

Uçuşların və sərnişinlərin sayına qoyulan bütün məhdudiyyətlər aradan qaldırılıb.

Hava limanında sərnişinlərin və onları müşayiət edən şəxslərin sayına qoyulan məhdudiyyət aradan qaldırılıb.

İsrailin hava limanlarının administrasiyası və Ben Qurion Hava Limanı uçuşların cədvəlini bərpa etmək və normal rejimə qayıtmağı maksimal şəkildə sürətləndirmək üçün bütün aviaşirkətlərlə sıx əlaqədədirlər.

İctimaiyyətə uçuşların cədvəli ilə bağlı ən son məlumatı almaq üçün aviaşirkətlərin bəyanatlarını izləməyi tövsiyə edirik” – bəyanatda qeyd olunub.