Gürcüstan Prezidenti Mixeil Kavelashvili Serbiya Respublikasının Prezidenti Aleksandar Vuçiç ilə görüşüb.

Gürcüstan Prezidentinin mətbuat xidmətinin məlumatına görə, “Serbiya Sarayı”nda baş tutan təkbətək görüşdə Mixeil Kavelashvili və Aleksandar Vuçiç Gürcüstanla Serbiya arasında siyasi, iqtisadi, texnoloji və mədəni sahələrdə əməkdaşlığın dərinləşdirilməsi məsələlərini müzakirə ediblər. Bununla yanaşı, mövcud dostluq əlaqələri, mədəni yaxınlıq, ümumi dəyərlər və çağırışlar barədə də fikir mübadiləsi aparılıb ki, bu da münasibətlərin daha da inkişafı üçün möhkəm zəmin yaradır.

“Görüşdə Gürcüstan və Serbiyada gedən siyasi proseslər müzakirə edilib, həmçinin dünyada sülhün və sabitliyin əhəmiyyətinə diqqət yetirilib.

Görüşdə Mixeil Kavelashvilinin qeyd etdiyi kimi, Gürcüstan üçün Serbiyanın Gürcüstanın suverenliyi və ərazi bütövlüyünə verdiyi dəstək dəyərlidir.

Gürcüstan Prezidenti serbiyalı həmkarını Gürcüstana dəvət edib”, – deyə Gürcüstan Prezidentinin mətbuat xidməti tərəfindən yayılan məlumatda bildirilir.

Mixeil Kavelashvili Serbiya Respublikasında rəsmi səfərdə nümayəndə heyəti ilə birlikdədir. Gürcüstan nümayəndə heyətinin tərkibinə daxildir: Xarici İşlər naziri Maka Boçorişvili, Gürcüstan Parlamentinin deputatları – İrakli Mezurnişvili, İrma Zavradaşvili, Guram Maçaraşvili, Gürcüstanın Serbiya Respublikasındakı səfiri Levan Beridze və Gürcüstan Prezidentinin Administrasiyasının nümayəndələri.