Gürcüstan Pravoslav Kilsəsinin Patriarxlığında Müqəddəs Sinodun iclası davam edir. Patriarxlığın məlumatına görə, iclasda 38 yepiskop iştirak edir. Sinod üzvləri Ümumgürcüstan Katolikos-Patriarxı vəzifəsinə üç namizəd seçəcəklər.
Katolikos-Patriarxlığa namizəd aşağıdakı tələblərə cavab verməlidir: milliyyətcə gürcü olmalı, Gürcüstan Pravoslav Kilsəsinin yepiskopu olmalı, ilahiyyat təhsili və kilsə idarəçiliyi üzrə kifayət qədər təcrübəyə malik olmalı, yaşı ən azı 40, ən çoxu 70 olmalı və monax olmalıdır.
Sinodun hər bir üzvünün bir namizəd irəli sürmək hüququ var, o cümlədən öz namizədliyini də təqdim edə bilər.
Sinodda səs çoxluğu qazanan üç yepiskop genişləndirilmiş kilsə yığıncağında patriarxlığa namizəd kimi səsverməyə çıxarılacaq.
Əgər yığıncaqda namizədlərdən heç biri səslərin yarıdan çoxunu qazana bilməzsə, təkrar səsvermə keçiriləcək. Bu mərhələdə ilk səsvermədə ən çox səs toplamış iki namizəd iştirak edəcək.
Genişləndirilmiş yığıncaqda Katolikos-Patriarxın seçilməsi üzrə səsvermədə yalnız yepiskoplar iştirak edir. İştirakçı yepiskopların səslərinin yarıdan çoxunu qazanan namizəd seçilmiş hesab olunur.
Bununla yanaşı, genişləndirilmiş yığıncağın çağırılma tarixi kilsə nizamnaməsinə əsasən müəyyən edilir – yığıncaq patriarxın vəfatından 40 gün sonra, lakin ən gec iki ay ərzində keçirilməlidir.
Yığıncağın keçirilmə tarixini Sinod bu gün də müəyyən edə bilər. Lakin Patriarxlığın ictimaiyyətlə əlaqələr xidmətinin rəhbəri Andria Jagmaidzenin sözlərinə görə, bu məsələnin məhz bu gün müzakirə olunması mütləq deyil. Onun qeyd etdiyinə görə, patriarxın seçiləcəyi genişləndirilmiş kilsə yığıncağı mayın 17-dək keçirilməlidir.