“Gürcüstan Dəmir Yolları”nda korrupsiya sxemi ilə əlaqədar səkkiz nəfər məsuliyyətə cəlb edilib, sabiq direktor Davit Peradzeyə qiyabi şəkildə ittiham irəli sürülüb
Bu gün Dövlət Təhlükəsizliyi Xidmətində “Gürcüstan Dəmir Yolları”nın sabiq rəhbər şəxslərinin korrupsiya sxemində iştirakı ilə bağlı brifinq keçirilib. Dövlət Təhlükəsizliyi Xidmətində bəyan etdikləri kimi, səkkiz nəfərdən söz gedir. Belə ki, onların şirkətdə çalışdıqları dövrdə korrupsiya sxemlərindən istifadə olunub, bununla da müxtəlif cinayətkar üsullarla dövlətə məxsus külli miqdarda vəsaiti mənimsəyiblər və qanunsuz yolla əldə edilmiş əmlakı qanuniləşdiriblər.
Dövlət Təhlükəsizliyi Xidmətinin məlumatına əsasən, söhbət aşağıdakı cinayətlərdən gedir – mütəşəkkil dəstə tərəfindən törədilmiş külli miqdarda dələduzluq, bu cinayətin törədilməsinə kömək etmək, qrup halında törədilmiş saxta hesablaşma sənədinin hazırlanması və istifadəsi, saxta rəsmi sənədin hazırlanması və istifadəsi, bu cinayətin törədilməsinə kömək etmək, eləcə də mütəşəkkil dəstə tərəfindən törədilmiş, xüsusilə külli miqdarda gəlirin əldə edilməsi ilə müşayiət olunan qanunsuz gəlirin leqallaşdırılması.
“Qeyd olunmuş əməllərlə bağlı istintaq Gürcüstan Cinayət Məcəlləsinin 180-ci maddəsinin 3-cü hissəsinin “a” və “b” yarımbəndləri, 4-cü hissəsinin “a” yarımbəndi, 194-cü maddəsinin 3-cü hissəsinin “a” və “q” yarımbəndləri, 210-cu maddəsinin 2-ci hissəsinin “a” yarımbəndi, eləcə də 25, 180-ci maddəsinin 3-cü hissəsinin “a” və “b” yarımbəndləri, 25, 362-ci maddəsinin 2-ci hissəsinin “b” yarımbəndi və 362-ci maddəsinin 2-ci hissəsinin “b” yarımbəndi ilə aparılır, bu da cəza növü olaraq 9 ildən 12 ilədək müddətə azadlıqdan məhrumetməni nəzərdə tutur.
Dövlət Təhlükəsizliyi Xidmətinin Antikorrupsiya Agentliyində mütəşəkkil dəstənin digər üzvlərinin aşkarlanması və onlara qarşı qanunvericiliklə nəzərdə tutulmuş tədbirlərin görülməsi məqsədilə aktiv istintaq hərəkətləri davam etdirilir” — DTX-də keçirilən brifinqdə bəyan ediblər.
Bununla yanaşı, DTX-dən Birinci Kanala deyildiyi kimi, “Gürcüstan Dəmir Yolları”nın sabiq baş direktoru Davit Peradzeyə qeyd olunan iş üzrə qiyabi şəkildə ittiham irəli sürülüb.