Gürcüstan bir illiyinə Enerji Birliyinə sədrlik edəcək ölkə olacaq – bu haqda Avstriyada Vyana şəhərində Gürcüstan nümayəndə heyəti ilə birlikdə Enerji Birliyinə üzv ölkələrin nümayəndələrinin iştirak etdiyi qəbulda rəsmi bəyanat verilib.

Gürcüstan 2017-ci ildə Enerji Birliyinə üzv olub və reqlamentə əsasən, 2025-ci ildə ilk dəfə təşkilata sədrlik edəcək.

Enerji Birliyi enerji təhlükəsizliyi, enerji davamlılığı və ekoloji məqsədlərə nail olmaq üçün Avropa İttifaqı ilə üzv dövlətlər arasında qarşılıqlı əməkdaşlığı təmin edən beynəlxalq təşkilatdır.

İqtisadiyyat Nazirliyinin məlumatına əsasən, Enerji Birliyinin sazişin iştirakçısı olan doqquz tərəfi var – Gürcüstan, Albaniya, Bosniya və Herseqovina, Kosovo, Şimali Makedoniya, Moldova, Monteneqro, Serbiya və Ukrayna.

“Qeyd edilməlidir ki, Avropa İttifaqı həm də Enerji Birliyi müqaviləsinin tərəfidir və təşkilatın daimi vitse-prezidentidir. Gürcüstanın Enerji Birliyinə üzvlüyü və sədrliyi bir daha Gürcüstanın Avropa İttifaqı ilə enerji sahəsində əməkdaşlığın dərinləşdirilməsinə, davamlı enerji siyasətinin təşviqinə və enerji təhlükəsizliyinin gücləndirilməsinə sadiqliyini təsdiqləyir” – yayılmış bəyanatda deyilir.

Enerji Birliyinin direktoru Artur Lorkovski bildirir ki, son üç il ərzində Gürcüstan İqtisadiyyat Nazirliyinin rəhbərliyi ilə böyük irəliləyiş əldə edib.

“Bu gün Vyanada Gürcüstanın sədrliyinin başlanmasını qeyd edirik və deməliyəm ki, Gürcüstan bu günə çox yaxşı hazırlaşıb. Son üç il ərzində Gürcüstan İqtisadiyyat Nazirliyinin rəhbərliyi ilə ölkənin Enerji Birliyinə qoşulması ilə üzərinə götürdüyü öhdəliklərin yerinə yetirilməsi istiqamətində böyük irəliləyiş əldə edib. Buna görə də bu gün Gürcüstan Enerji Birliyində qanunvericilik çərçivəsinin tətbiqi baxımından aparıcı icraçılardan biridir. Prezidentlik əlavə öhdəlik və məsuliyyətdir, çünki məsuliyyət birliyə üzv ölkələrdə bütün prosesin idarə olunmasına aiddir. İnanırıq ki, Gürcüstan lider və ədalətli oyunçu olmaq qabiliyyətinə malikdir və bu, bizi 2025-ci ildə uğura aparacaq. Enerji Birliyi ölkələrinin və Avropa İttifaqı bazarlarının inteqrasiyasına gəlincə, görüləcək həqiqətən çox şey var və Gürcüstanın liderlik bacarığına və ədalətli oyunçu olmasına həqiqətən ehtiyacımız var, xüsusən indi, Enerji Birliyi üçün çətin dövrdə, Ukrayna və Moldova bazarlarının Rusiyanın işğalı və onun nəticələrindən mənfi təsirləndiyi bir vaxtda” – Lorkovski bildirib.