Gürcüstan, Azərbaycan, Türkmənistan və Özbəkistan “Orta Dəhliz” boyunca əməkdaşlığın genişləndirilməsini müzakirə ediblər.

Türkmənistanın paytaxtı Aşqabadda Azərbaycan Dəmir Yollarının sədri Rövşən Rüstəmov, Türkmənistanın Dəmir Yolu Nəqliyyatı naziri Mamet Akmamedov, Özbəkistan Dəmir Yolları Şurasının sədri Zufar Narzulayev və Gürcüstan Dəmir Yollarının baş direktoru Laşa Abaşidze arasında dördtərəfli görüş keçirilib.

Görüş zamanı tərəflər qarşılıqlı maraq doğuran məsələləri, həmçinin dəmir yolu sektoru və regionun əsas tranzit marşrutlarından biri olan “Orta Dəhliz” boyunca əməkdaşlığın genişləndirilməsi imkanlarını müzakirə ediblər.

Tərəflər həmçinin “Orta Dəhliz”in rəqabət qabiliyyətinin artırılması və bu marşrutda yük daşımalarının həcminin artırılması ilə bağlı fikir mübadiləsi aparıblar. Daha səmərəli yük daşımaları üçün əməliyyatların rəqəmsallaşdırılmasının əhəmiyyəti qeyd edilib.

Dördtərəfli görüşdən sonra “Orta Dəhliz” boyunca yük daşımalarının rəqəmsallaşdırılması və inkişafı, eləcə də dəhlizin diaqnostikası kimi sahələri əhatə edən protokol imzalanıb.