Gürcüstan 2027-ci ildə Üzüm və Şərab üzrə Beynəlxalq Təşkilatın Dünya Konqresinə ev sahibliyi edəcək

Fransanın Dijon şəhərində keçirilən Üzüm və Şərab üzrə Beynəlxalq Təşkilatın (OIV) yaz sessiyasında qərar verilib: Gürcüstan 2027-ci ildə təşkilatın Dünya Konqresinə ev sahibliyi edəcək.

Gürcüstan 2027-ci ildə OIV Dünya Konqresinə ev sahibliyi etmək üçün müraciətini rəsmi olaraq 2025-ci ildə təqdim etmişdi.

Sessiyada Gürcüstanın Milli Şərab Agentliyinin sədri Levan Mexuzla iştirak edib. O bildirib:
“OIV, üzümçülük və şərabçılıq sahəsində ən vacib təşkilatdır. Bu qərarla bir daha vurğulanacaq ki, Gürcüstan şərab mədəniyyətinin dünya xəritəsində mühüm rola malikdir və ölkəmiz üzümçülük və şərabçılıq sahəsində önəmli mərkəzdir. Bu isə nəticədə gürcü şərabının tanınmasına və qlobal bazarda mövqeyinin möhkəmlənməsinə kömək edəcək.”

Qeyd edək ki, Gürcüstan artıq OIV-in beynəlxalq tədbirlərinə iki dəfə ev sahibliyi edib: 1962-ci ildə 33-cü Dünya Konqresinə və 2010-cu ildə təşkilatın 8-ci Baş Assambleyasına.

OIV, 51 üzv ölkəni birləşdirən beynəlxalq hökumətlərarası təşkilatdır. Təşkilat üzv ölkələrdə üzümçülük və şərabçılıq sahəsində tövsiyələr hazırlayır, istehsal və üzüm emalı praktikalarını təkmilləşdirir, həmçinin beynəlxalq standartlar yaradır və inkişaf etdirir.