Guram Maçaraşvili – Əgər Qulevi zavoduna qarşı sanksiya tətbiq edilməsi qərarı qəbul olunarsa, bu, yalnız avropalı bürokratların, eyni zamanda qlobal müharibə tərəfdarlarının “gəlin Gürcüstanı cəzalandıraq” yanaşmasına əsaslanacaq

İcraedici və qanunverici hakimiyyət sanksiya tətbiq etməyi planlaşdıran tərəfi bu sanksiyaların heç bir əsasının olmadığına inandırmağa çalışacaq.
Bunu “Xalqın Gücü” partiyasının icraçı katibi Guram Maçaraşvili bildirib.

Onun sözlərinə görə, Avropa bürokratiyasının Gürcüstana münasibəti tamamilə ədalətsiz və əsassızdır.

“İlk növbədə, Avropa bürokratiyasının Gürcüstana yanaşmasını nəzərdən keçirməliyik. Bu yanaşma tamamilə ədalətsiz və əsassızdır. Buraya ayrı-ayrı şəxslərə, dövlət vəzifəli şəxslərinə və biznesə qarşı tətbiq edilən sanksiya sistemi də daxildir. Bütün bunlar nə ilə bağlıdır? Yeganə səbəb odur ki, Gürcüstan Rusiya ilə müharibəyə başlamır, gey paradlarını təsdiqləmir, eynicinsli nikahları qanuniləşdirmir.

Bunlar qətnamələrdə də yazılıb, bunu biz uydurmuruq, açıq şəkildə qeyd edirlər. Səhv etmirəmsə, 6-dan çox qətnamə qəbul edilib və həmin sənədlərdə birbaşa göstərilir ki, Avropa bürokratiyasının tələbləri yerinə yetirilməsə, biznes də sanksiyalara məruz qala bilər.

Onlar ölkənin dağılmasını, Ukraynada baş verənlərin Gürcüstanda da yaşanmasını istəyirlər. Buna görə də cəmiyyətin böyük əksəriyyəti bu sözdə sanksiya sistemini ədalətsiz hesab edir”, – deyə Maçaraşvili bildirib.

Maçaraşvilinin sözlərinə görə, Gürcüstan hakimiyyəti Qulevidə yerləşən neft emalı zavoduna qarşı sanksiyaların tətbiq edilməsinin əsassız olduğuna Avropa tərəfini inandırmağa çalışacaq.

“İcraedici və qanunverici hakimiyyət sanksiya tətbiq etməyi planlaşdıran tərəfi bu sanksiyaların heç bir əsası olmadığına inandırmağa çalışacaq. Ola bilər ki, bu yanaşmalar nəticə versin.

Əgər buna baxmayaraq qərar qəbul edilərsə, bu, yalnız Avropa bürokratiyasının, eyni zamanda “qlobal müharibə partiyası” adlandırdıqları qüvvələrin “gəlin indi Gürcüstanı, cəmiyyəti və biznesi cəzalandıraq ki, onları öz tərəfimizə – yəni qlobal müharibə tərəfdarlarının tərəfinə keçirək” yanaşmasına əsaslanacaq.

Görək danışıqlar və Gürcüstan hakimiyyətinin inandırma cəhdləri necə nəticələnəcək. Ola bilər ki, Avropa bürokratiyasında sağlam düşüncəli biri tapılsın və desin: görürsünüz, Gürcüstanda sanksiyalar işləmir, əksinə, gürcü cəmiyyəti daha da güclənir”, – deyə Maçaraşvili qeyd edib.

Məlumat üçün bildirək ki, Avropa İttifaqının sanksiyalar üzrə 21-ci paketinə Qulevidə yerləşən neft emalı zavodu da daxil edilib. Sanksiyaların qüvvəyə minməsi üçün altı aylıq müddət müəyyən edilib.