Gitanas Nauseda: İspaniya anklavında davam edən böhran fonunda Avropa İttifaqı sərhədlərini qorumalıdır.

Litva Prezidenti Gitanas Nausedanın sözlərinə görə, İspaniyanın Şimali Afrikadakı anklavında davam edən böhran fonunda Avropa İttifaqı öz sərhədlərini qorumalıdır.

Nauseda bildirib ki, Avropa Şurasının iclaslarında Aİ-nin aydın miqrasiya siyasəti formalaşdırması üçün əlindən gələni edəcək.

“Burada söhbət həm milli təhlükəsizlikdən və aqressiv qonşularla münasibətlərdən, həm də miqrasiyadan gedir. Litva bu məsələdə ölkənin öz sərhədlərinin təhlükəsizliyini necə təmin etdiyinə nümunədir. Baxmayaraq ki, son illərdə biz də ciddi gərginlik yaşamışıq, bunun öhdəsindən gəlmişik”, – deyə Litva prezidenti bildirib.

Onun sözlərinə görə, İspaniya anklavındakı vəziyyət Avropa İttifaqının daxili sabitliyinə mane olur, Şengen zonasının fəaliyyətini sual altına qoyur və daxili maneələrin, eləcə də sərhədlərin yaranmasına zəmin yaradır.

Litva prezidentinin fikrincə, bu, Avropa İttifaqının əsas ideyasına ziddir.

“Avropa İttifaqı mənim inancıma görə, xaricdən yaxşı qorunmalı, eyni zamanda ittifaq daxilində heç bir maneə və ya daxili sərhəd olmamalıdır”, – deyə Nauseda bildirib.

Qeyd edək ki, İspaniya təhlükəsizlik qüvvələrinin ilkin qiymətləndirməsinə görə, son günlər ərzində Seutaya 40 mindən çox qeyri-qanuni miqrant daxil olub.