Baş Prokurorluq müəllim Qiqa Avalianinin ölümü ilə bağlı iş üzrə saxlanılan şəxslərə qrup halında zorakılıq ilə bağlı yeni ittihamlar irəli sürüb. Prokuror Qiorqi Mikaia bu barədə qurumda keçirilən brifinqdə deyib.

Brifinqdə məlum olduğu kimi, bu şəxslər tərəfindən törədilən digər cinayət əməlindən söz gedir. Prokurorluq müvafiq video materialı da yayıb.

“Gürcüstanın Daxili İşlər Nazirliyində, Gürcüstan Prokurorluğunun nəzarəti altında cari istintaq çərçivəsində indiyədək yüzlərlə istintaq hərəkəti həyata keçirilib, yüzə yaxın şahid dindirilib, müxtəlif növ ekspertizalar təyin olunub və qəbul edilib, bunun nəticəsində də müəyyən edilib ki, 2025-ci ilin sentyabrında Aleksandre Qabaşvili Nia İmnadzedən öyrənib ki, o, Qiqa Avalianinin yanında riyaziyyat fənni üzrə hazırlığa başlayıb və onun dediyinə görə, Qiqa Avaliani ona həddindən artıq diqqət göstərib. Aleksandre Qabaşvili dostları Qiorqi Rikadze və Demetre Çikovani ilə əlaqə saxlayaraq baş verənlər haqqında onlara danışıb, bundan sonra da onlar birlikdə Qiqa Avalianiyə qrup halında hücum etmək və onun sağlamlığına ağır zərər vurmaq qərarına gəliblər.

Bu məqsədlə onlar Qiqa Avalianinin şəxsiyyətini müəyyən ediblər, onun sosial şəbəkə hesabını yoxlayaraq, xarici görünüşünü tanıyıb yadda saxlamaq üçün oradan şəklini yükləyiblər. Onun iş və yaşayış ünvanlarını öyrəniblər, iş qrafikini, işdən evə hansı yolla getdiyini araşdırıblar. Niyyətlərini həyata keçirmək üçün yeri seçib və onu izləməyə başlayıblar.

2025-ci ilin sentyabrın 29-da, axşam saatlarında Aleksandre Qabaşvili, Qiorqi Rikadze və Demetre Çikovani hesablaşmaq məqsədilə Tbilisi şəhərində, Dəniz məhəlləsi yaşayış məntəqəsində yerləşən tədris mərkəzinin yanına gəliblər. Orada pusqu qurublar və Qiqa Avalianiyə hücum edərək onun sağlamlığına ağır zərər vurmaq üçün hər cür şərait yaradıblar. Təxminən 20:00–dan 22:00-a qədər olan zaman kəsiyində mərkəzdən Qiqa Avalianinin çıxmasını gözləyiblər, lakin həmin gün onlardan asılı olmayan səbəblərdən niyyətlərini həyata keçirə bilməyiblər.

2025-ci ilin oktyabrın 1-də Aleksandre Qabaşvili, Qiorqi Rikadze və Demetre Çikovani tərəfindən hazırlanmış plana əsasən, Aleksandre Qabaşvili və Qiorqi Rikadze niyyətlərini həyata keçiriblər. Belə ki, təxminən saat 22:20-də Tbilisi şəhəri, Dəniz məhəlləsi yaşayış məntəqəsi, 11-ci mikrorayon, 3-cü kvartal, 56A korpusuna bitişik ərazidə Aleksandre Qabaşvili və Qiorqi Rikadze qrup halında Qiqa Avalianiyə hücum ediblər və hücum nəticəsində o, ağır xəsarətlər alıb. Nəticədə Qiqa Avaliani 2025-ci ilin oktyabrın 24-də tibb müəssisəsində vəfat edib.

Cinayət işi üzrə davam edən istintaq çərçivəsində qeyd olunan şəxslərin iştirakı ilə digər cinayət faktları da aşkar edilib:

Aleksandre Qabaşvili, Qiorqi Rikadze, Demetre Çikovani və digər şəxslər onlar üçün qəbuledilməz şəxsləri müəyyən etmək və cəzalandırmaq məqsədilə qrup halında zorakılığı təşkil ediblər. Onlar razılaşıblar ki, belə şəxsləri sistemli şəkildə seçsinlər, onlarla ünsiyyət qursunlar, aldadaraq görüşməyə razı salsınlar və fiziki zor tətbiq etsinlər. Qiorqi Rikadze, Demetre Çikovani, Aleksandre Qabaşvili və digər şəxslər müxtəlif kommunikasiya vasitələri ilə özləri guya qızların adından seçilmiş qurbana yazır, onları çölə çıxmaq üçün aldadır, əvvəlcədən seçilmiş vaxt və yerdə görüşə razı salır, pusqu qurur və qrup halında onlara fiziki zor tətbiq edirdilər. Bu qurbanın amansız şəkildə döyülməsi və sözlü təhqirdə özünü göstərirdi. Qrup halında zorakılığı kameraya çəkir, zorakılığı əks etdirən görüntüləri isə mobil telefonlarda saxlayır və məqsədli qruplarda yayırdılar” – Prokurorluqda keçirilən brifinqdə bəyan ediblər.