Futbol üzrə dünya çempionatının açıq yayımlarının təşkili ilə əlaqədar olaraq, iyulun 7-dən 21-dək Tbilisinin Birinci Respublika meydanında nəqliyyatın hərəkəti müvəqqəti məhdudlaşdırılacaq

Futbol üzrə dünya çempionatının açıq nümayişi ilə əlaqədar olaraq, 7 iyul saat 23:00-dan 21 iyul saat 08:00-dək Tbilisinin Birinci Respublika meydanında avtomobil hərəkəti tam şəkildə məhdudlaşdırılacaq. Bu barədə Tbilisi meriyası məlumat yayıb.

Məlumata görə, müvəqqəti məhdudiyyət Şota Rustaveli prospekti ilə Birinci Respublika meydanının kəsişməsindən Merab Kostava küçəsinin kəsişməsinə qədər olan yol hissəsini əhatə edəcək.

Qeyd olunub ki, məhdudiyyət müddətində avtomobillər Rustaveli prospektindən (Zeytun ağacı ətrafı) Respublika meydanı istiqamətində hərəkət edə bilməyəcək. Rustaveli prospektindən Kostava küçəsi istiqamətində hərəkət edən nəqliyyat vasitələri isə yalnız Mixeil Cavaxaşvili və Merab Kostava küçələri istiqamətində hərəkət edə biləcək.

Mixeil Cavaxaşvili küçəsindən gələn avtomobillər Birinci Respublika meydanına daxil ola bilməyəcək və hərəkəti Tbilisi Dövlət Konsert Zalının istiqamətində davam etdirəcəklər. Kostava küçəsindən isə hərəkət yalnız Rustaveli prospekti və Azadlıq meydanı istiqamətində mümkün olacaq.

İctimai nəqliyyatda da dəyişikliklər nəzərdə tutulur. N359 avtobusu və N457 mikroavtobusunun marşrutları müvəqqəti olaraq dəyişdiriləcək. N359 avtobusu Mardjanışvili küçəsindən Vake istiqamətində hərəkət edərkən Cavaxaşvili küçəsindən Respublika meydanına daxil olmayacaq və Kostava küçəsi istiqamətində hərəkətini davam etdirəcək. Geriyə istiqamətdə isə marşrut dəyişməz qalacaq.

Eyni şəkildə, N457 mikroavtobusu da Mardjanışvili küçəsindən Rustaveli prospekti istiqamətində hərəkət edərkən Cavaxaşvili küçəsindən Respublika meydanına daxil olmayacaq, Tabaşvili küçəsi ilə Ləğidze küçəsi vasitəsilə Rustaveli prospektinə qoşulacaq və daha sonra əvvəlki marşrutla hərəkət edəcək. Geriyə istiqamətdə isə marşrut dəyişdirilməyəcək.