Almaniyanın kansleri Fridrix Merts Almaniyada sığınacaq axtaran suriyalı qaçqınların Suriyanın yenidən qurulmasında mühüm rol oynamalı olduqlarını və Berlinin bu işdə onlara kömək edəcəyini bildirib. Almaniyanın kansleri bu bəyanatı Suriya Prezidenti Ahmed al-Şaraa ilə görüşdən sonra verib.

O, bir çox suriyalı qaçqının Almaniyaya əhəmiyyətli töhfələr verdiyini, lakin əksəriyyətinin vətənlərinə qayıtmaq istədiyini bildirib.

Mertsin bəyanatına əsasən, Almaniya Suriyada yenidənqurma prosesinə dəstək vermək istəyir və ölkələrinə qayıtmaq istəyənlərə kömək etmək üçün Dəməşq hökuməti ilə işləyir.

“Suriyada bizneslərin, məktəblərin, uşaq bağçalarının və xəstəxanaların illər ərzində dağıdılmasından sonra onlar ölkənin yenidən qurulmasında mühüm rol oynayacaqlar. Son bir neçə həftə ərzində yenidənqurma və qayıtmaq üçün iddialı birgə iş proqramı hazırladıq və bu proqram hazırda həyata keçirilir” – Merts birgə mətbuat konfransında deyib.

Suriya Prezidenti Ahmed al-Şaraa öz növbəsində bildirib ki, Suriya vətəndaş müharibəsi zamanı Almaniyanın qaçqınlara qapılarını necə açdığını heç vaxt unutmayacaq və iki ölkənin tərəfdaşlığı bərpa edəcəyini qeyd edib.

“Almaniyadakı dostlarımızla birlikdə istedadlı suriyalıların ölkələrinin yenidən qurulmasına töhfə verməsinə imkan verəcək dairəvi miqrasiya modeli yaratmaq üzərində işləyirik” – Ahmed al-Şaraa bildirib.

Məlumat üçün bildirək ki, Fridrix Mertsin koalisiya hökuməti hakimiyyətə gəldikdən sonra Almaniyada sığınacaq axtaranlara daha sərt nəzarət tətbiq edib. Suriya vətəndaş müharibəsi zamanı Almaniya təxminən bir milyon suriyalı qaçqını qəbul edib və onların əksəriyyəti bu günə qədər Almaniyada yaşayır.