Gürcüstanın basketbolçulardan ibarət yığması “EuroBasket 2025″in 1/4 final mərhələsinin matçını Finlandiyaya qarşı keçirəcək. Qarşılaşma saat 18:00-da başlayacaq, birbaşa reportajı isə Birinci Kanal sizə təqdim edəcək.

Gürcüstan

Gürcülər üçün bu artıq tarixi “EuroBasket”dir – indiyədək 1/4 finala bir dəfə belə olsun çıxmamışıq. Kapitan Tornike Şenqelia deyir: “Tarixi nəticədir, seviniləsidir, lakin nail olduqlarımızla kifayətlənməyi planlaşdırmırıq”.

Tornike, eləcə də yığmanın hər bir üzvü Finlandiya ilə oyun və qələbənin nə qədər vacib olduğunu yaxşı anlayır. İki qələbə artıq medalın qarantıdır – podiuma bu qədər yaxın hələ heç olmamışıq.

Gürcüstanın yığması sentyabrın 9-da açıq məşq keçirdi və komandada şən, eyni zamanda mübariz əhval-ruhiyyə gördük. Bu heç də təəccüblü deyil, axı gürcülər inanılmaz dərəcədə yaxşı səfərbər ola bilirlər. Vaxtilə, 60 il əvvəl, əfsanəvi latviyalı məşqçi Aleksandr Qomelski deyib – “Gürcülər güclərini konkret bir oyuna qeyri-insani dərəcədə cəmləyə bilirlər”.

İspaniya, Fransa ilə belə oldu və ümid edək ki, Finlandiya ilə də belə olacaq.

Taktika

Finlandiyanın yığması bizim üçün narahat rəqibdir: hər zaman üçxallıq atışlarla Gürcüstanın yığmasını məğlub etməyə çalışırdı və dörd oyunun hamısını məhz perimetrdən qazanıb. Avropa Çempionatında yalnız bir dəfə qarşılaşmışıq (2011-ci ildə) və onda bizə 13 üçxallıq atış vurmuşdular.

Serbiyanın başına da bu gəldi – Finlandiya soyuqqanlılıqla üçxallıqları atdı, 15 dəfə səbətə dəqiq göndərdi və qalib gəldi.

Bu, serblər üçün bir az gözlənilməz idi, bunu gözləmirdilər və nə baş verdiyini sona qədər başa düşə bilmirdilər. Gürcüstan isə bilir – Finlandiya üçxallıq atışı meydançanın hər yerindən atır, çünki onun qalib gəlmək üçün başqa şansı yoxdur.

Finlandiyanın Lauri Markkaneni, NBA səviyyəli forvardı var, lakin nə Lauri Markkanen, nə də Muurinen-Lehtonen Gürcüstan üzərində indi də üstünlük qazana bilməyəcəklər və əvvəllər də heç vaxt üstünlük qazanmayıblar. Səbəb: əvvəllər yığmamızda Zaza Paçulia və Qiorqi Şermadini çıxış edirdi, indi – Bitadze, Şermadini, Şenqelia, Mamukelaşvili və Burcanadze.

Şərh

Teemu Raniko, Finlandiyanın yığmasının məşqçilər korpusunun üzvü:

“Gürcüstanın hündürboylu yığması var. Tempi aşağı salmağa, xalları səbət altından qazanmağa çalışacaq. Hücum ribaundlarında Gürcüstan fərqlənir, buna görə biz ribaundlar üzərində çox işləməliyik. Seçmə mərhələdə onlarla qarşılaşmışdıq, lakin başqa heyətləri var idi. “EuroBasket”də onlara Mamukelaşvili və Bitadze qoşulub, bu isə böyük gücdür”.

Duda Sanadze:

“Seçmə mərhələdə Finlandiya üzərində vacib qələbələrimiz oldu. Əgər onlardan birini uduzsaydıq, bəlkə də Avropa Çempionatına vəsiqə qazana bilməzdik. Lakin seçmə mərhələni də keçdik, “EuroBasket”in qrup mərhələsini də, 1/8 finalı da keçdik və indi 1/4 finalda yenə Finlandiya ilə qarşılaşırıq.

Rəqibimiz seçmə mərhələdəki komandadan xeyli fərqlidir – komandanın oyun üslubunu radikal şəkildə dəyişən Lauri Markkanen var. Bizə də Amerikada oynayan Qoqa Bitadze və Sandro Mamukelaşvili qoşulublar. Çox maraqlı oyun olacaq”.

Qarşılıqlı görüşlər

Finlandiyanın yığması ilə ilk dəfə 2004-cü ildə qarşılaşdıq. Bu B divizionunda, Tbilisidə, 12 min azarkeşin iştirakı ilə idi. İlk hissədə 39:52 hesabı ilə uduzurduq, sonda isə 85:78 hesabı ilə qalib gəldik. Cavab görüşündə uduzduq, bu səbəbdən A divizionuna keçə bilmədik.

Növbəti mövsümdə də Finlandiya qrupumuzda idi və səfərdə məğlubiyyətə görə yuxarı liqaya keçmək üçün pley-off mərhələsinə düşə bilmədik. 2011-ci ildə yenə də “EuroBasket”də oynamağı bacardıq, lakin orada da Finlandiya ilə qarşılaşdıq və 73:87 hesabı ilə məğlub olduq.

Finlandiyanın yığmasının baş məşqçisi Lassi Tuovi isə deyir – “İntiqam alasıyıq”. O, finlandiyalıları iki dəfə məğlub etdiyimiz sonuncu seçməni nəzərdə tutur. Ümumi hesab 5:4 Gürcüstanın xeyrinədir.

“EuroBasket”in yarımfinalına yüksəlməsi halında, Aleksandar Cikiçin komandasının rəqibi Almaniya və Sloveniya arasında matçın qalibi olacaq. Bu qarşılaşma daha sonra, saat 22:00-da başlayacaq və birbaşa reportajı Birinci Kanalda görəcəksiniz.