İqtisadi məsələlər üzrə Avropa komissarı Valdis Dombrovskis ABŞ-nin rus neftinin satışı ilə bağlı sanksiyalardan istisna müddətini uzatmaq qərarını tənqid edib.

Valdis Dombrovskis bu haqda Parisdə Böyük Yeddilik ölkələrinin maliyyə nazirlərinin görüşündən əvvəl deyib.

Dombrovskisin qeyd etdiyi kimi, bu addım Moskvanın müharibənin başlamasından sonra əldə etdiyi maliyyə gəlirlərini artıracaq.

“Avropa İttifaqının mövqeyindən biz hesab etmirik ki, indi Rusiyaya təzyiqi azaltmağın vaxtıdır” – Avropa komissarı bildirib.

Bununla yanaşı, Dombrovskis bildirib ki, Ukraynadakı müharibədən və qazıntı yanacaq qiymətlərinin artmasından faydalanan məhz Rusiyadır.

Mayın 18-də ABŞ-nin xəzinədarlıq katibi Skott Besent Vaşinqtonun dənizdə dayanmış tankerlərə yüklənmiş rus nefti üçün sanksiyalardan istisna müddətini 30 gün uzadacağını açıqlayıb.