Ermənistanın İstintaq Komitəsinin verdiyi məlumata əsasən, istintaq qrupu Ermənistanın müxtəlif bölgələrində 51 ünvanda axtarışlar həyata keçirir.

Qurumun bildirdiyinə görə, “iqtisadi cinayətlərin araşdırılmasına cavabdeh Baş İdarə” tərəfindən o şəxslərə qarşı cinayət işi araşdırılır ki, onlar faktiki olaraq bir sıra şirkətləri idarə edirlər və bu şirkətlər vasitəsilə xüsusilə böyük miqdarda əmlak mənimsəmək, pulların yuyulması və vergidən yayınmaq üçün saxta əsaslar yaradıblar.

İstintaq Komitəsinin məlumatına görə, ilkin araşdırma çərçivəsində 11 nəfərə qarşı cinayət işi açılıb. Onlardan beşi barəsində məhkəmə tərəfindən ilkin həbs qətimkan tədbiri seçilib, bir nəfərin ölkəni tərk etməsi qadağan olunub, bir nəfər saxlanılıb və məhkəməyə gətirilib, dörd nəfər isə axtarışa verilib.

Qeyd edək ki, bu gün səhər saatlarından etibarən Yerevanda – “Ermənistan Elektrik Şəbəkəsi”nin baş ofisində, eləcə də bu şirkətin Direktorlar Şurasının sədri Narek Karapetyanın evində axtarış aparılıb.