Ermənistanın Xarici İşlər Nazirliyi Batumidəki faciəyə cavab verir.

“Batumidə yaşayış binasının çökməsi  bizi kədərləndirdi. Həlak olanların ailələrinə başsağlığı verir, yaralıların tezliklə sağalmasını diləyirik. Ermənistan Gürcüstanın dost xalqının yanındadır” deyilir Xarici İşlər Nazirliyi Twitter səhifəsində yaydığı bəyanatda.

Batumidə yaşayış binasının çökməsi nəticəsində 6 nəfər həlak olub. Xilasedicilər axtarış tədbirləri nəticəsində dağıntılar altından 5 cəsədi çıxarıblar. Dünən axşam saatlarında dağıntılar altından çıxarılan başqa bir vətəndaş bu gün səhər saatlarında klinikada dünyasını dəyişib.

Həkimlərin dediyinə görə, bu mərhələdə dağıntılar altından xilas edilən 36 yaşlı bir kişi klinikada qalır.

Batumidə axtarış və xilasetmə işləri davam edir. Xilasedicilərin dağıntılar altında daha üç nəfəri axtardıqları bildirilir.

Batumidə yaşayış binasının çökməsi ilə bağlı aparılan araşdırma çərçivəsində Daxili İşlər Nazirliyi 3 nəfəri saxlayıb. Saxlanılanlardan biri birinci mərtəbədə yerləşən mənzilin sahibidir.

Baş nazirin qərarına əsasən, 11 sentyabr Gürcüstanda matəm günü elan edilib.