Ermənistan və Fransa İran-Ermənistan və Gürcüstan-Ermənistan sərhəd hissələrini birləşdirəcək Şimal-Cənub magistralında Baquşat tunelinin tikintisi ilə bağlı razılaşma imzalayıblar.

Ermənistanın Baş naziri Nikol Paşinyan əlavə edib ki, Şimal-Cənub magistralı Ermənistanda həyata keçirilən superlayihələrdən biridir, Baquşat hissəsi isə ən çətinidir və onun tikintisi üçün xüsusi bacarıq tələb olunur.

“Həm Fransa, həm də Prezident Makron Ermənistanı dəstəkləyir və deyə bilərik ki, Şimal-Cənub superlayihəsi artıq formalaşır və biz bu yolun tam istismara verilməsi üçün atacağımız addımları təsəvvür edirik” – Paşinyan bildirib.

Erməni mediasına əsasən, bu yol (qismən yeni, qismən mövcud yolun genişləndirilməsi) İrandan Gürcüstan sərhədinə qədər olan məsafəni 550 km-dən 490 km-ə qədər azaldacaq, bu da Ermənistanda hərəkəti sürətləndirəcək və ölkə üçün yeni tranzit imkanları yaradacaq (o cümlədən İrandan Qara dənizə malların daşınması üçün).