Ermənistan Müdafiə Nazirliyi Azərbaycan ordusunu yaşayış məntəqəsi istiqamətində atəş açmaqda günahlandırır

Ermənistan Müdafiə Nazirliyi Azərbaycan ordusunu yaşayış məntəqəsi istiqamətində atəş açmaqda günahlandırır. Ermənistan Müdafiə Nazirliyinin bəyanatına əsasən, Azərbaycan Silahlı Qüvvələri aprelin 13-də, saat 22:20-də Syunik vilayətinin Xnatsax yaşayış məntəqəsini atəşə tutub, nəticədə kəndin mədəniyyət mərkəzinə ziyan dəyib.

Yerevanda insidentin tələfatla nəticələnmədiyini bildirirlər.

“Biz Azərbaycan tərəfini Xnatsaxın mədəniyyət evinə atəş açılması işini araşdırmağa və ictimai izahat təqdim etməyə çağırırıq. Xatırladaq ki, Ermənistan Respublikasının Baş nazirinin Aparatı atəşkəs rejiminin pozulması hallarının araşdırılması üçün Ermənistan-Azərbaycan birgə mexanizminin yaradılmasını təklif edib, lakin Azərbaycan hələ də bu təklifə cavab verməyib” – bəyanatda qeyd olunub.

Azərbaycan Müdafiə Nazirliyi Ermənistan Müdafiə Nazirliyi tərəfindən yayılan bəyanata münasibət bildirməyib.