Ermənistan Parlamentinin spikeri Alen Simonyan müxalifət partiyalarını “müharibə partiyaları” adlandırıb. Bu haqda erməni mediası yazır.

Onun sözlərinə əsasən, 2026-cı ilin iyununda Ermənistanın parlament seçkilərində əhali sülh və müharibə arasında seçim etməli olacaq.

“Artıq iki ildir sərhəddə düşmən atəşindən heç kim ölməyib. Müharibə, yoxsa sülh? Sovet İttifaqının dağılmasından bəri Ermənistan və Azərbaycan heç vaxt ticarətlə məşğul olmayıblar, Azərbaycan və Ermənistanın liderləri isə heç vaxt sülh haqqında danışmayıblar” – Simonyan bildirib.

“Başa düşürəm ki, indi iclas zalında əyləşən və parlamentə daxil olmaq istəyən qüvvələrin müharibəyə, müharibə haqqında danışmağa ehtiyacı var ki, sonradan bunun üzərində siyasi bir şey qursunlar, lakin indi müharibə yoxdur. İndi sülh var” – Simonyan bildirib.

“Ermənistanın indiki hökuməti, “Vətəndaş Müqaviləsi” partiyası sülh partiyasıdır, geridə qalan əsas müxalifət qüvvələri müharibə partiyalarıdır. Bu, reallıqdır” – o, qeyd edib.

Bir neçə gün əvvəl Ermənistanın Baş naziri Nikol Paşinyan bəyan etmişdi ki, müxalifət qüvvələri 2026-cı ildə Ermənistanın parlament seçkilərində qalib gəlsələr, ölkə müharibə təhlükəsi ilə üzləşəcək.