Erməni “Hraparak” qəzeti – Yerevan Moskvanın tələblərini yerinə yetirməzsə, Rusiya noyabrın 1-dən Ermənistana təbii qazın nəqlini tamamilə dayandıra bilər

18:38, 25.09.2026

 

Yerevan Moskvanın tələblərini yerinə yetirməzsə, Rusiya noyabrın 1-dən Ermənistana təbii qazın nəqlini tamamilə dayandıra bilər – bu barədə məlumatı erməni “Hraparak” qəzeti rus mənbələrinə istinadən yayır.

Qəzetin məlumatına əsasən, hazırda planlı təmir işləri elan olunub və istehlakçılara qaz toplanmış ehtiyatlar hesabına verilir.

Mənbələrin sözlərinə əsasən, noyabrın 1-dən sonra “böyük qəza” baş verə bilər və ya digər fors-major vəziyyət yarana bilər, bu səbəbdən də rus qazının nəqli artıq bərpa olunmaya bilər.

Bununla yanaşı, nəşrin mənbələrindən biri bildirib ki, Moskva Ermənistanın Baş naziri Nikol Paşinyana dörd tələb irəli sürüb və bu tələblərin yerinə yetirilməsi, ehtimal ki, belə bir ssenarinin qarşısını almalıdır.

Xüsusilə, birinci tələb Rusiyanın 102-ci hərbi bazasına aiddir – Paşinyana bu bazanın Ermənistanda qalması məsələsini müzakirə etməkdən imtina etmək təklif olunub; ikinci tələb Rusiyanın aktivlərinə, konkret olaraq dəmir yoluna və “Gazprom”a aiddir. Mənbənin sözlərinə əsasən, Ermənistan hakimiyyəti bu aktivlərlə bağlı Moskvada rus kapitalına hücum kimi qəbul edilə biləcək hərəkətləri dayandırmalıdır.

Üçüncü tələb Ermənistanın xarici siyasət seçiminə, yəni Avrasiya İqtisadi İttifaqı ilə Avropa İttifaqı arasında seçimlə bağlıdır. Moskva ehtimal ki, “Ermənistan Respublikasının Avropa İttifaqına daxil olması prosesinin başlanması haqqında” qanunun ləğv edilməsini və ya bu məsələ ilə bağlı referendumun tarixinin təyin olunmasını tələb edəcək.

Dördüncü tələb isə rusiyayönümlü siyasi və ictimai xadimlərə qarşı təqibin dayandırılmasını nəzərdə tutur. Söhbət Robert Koçaryan, Qaqik Tsarukyan, Andranik Tevanyan və Samvel Karapetyandan gedir.

Bundan başqa, mənbə bildirir ki, daha bir əlavə tələb var – Ermənistan hökumətinə Rusiya üçün məqbul olan və Rusiya hakimiyyətinin birbaşa əməkdaşlıq edə biləcəyi vitse-baş nazir təyin edilməsi.

Qəzet bu məlumatı Ermənistan hökumətinin nümayəndələri ilə dəqiqləşdirməyə çalışıb. Erməni qəzetinin xəbər verdiyi üzrə, real vəziyyət haqqında yalnız az sayda yüksək vəzifəli şəxsin məlumatı var. Ermənistanın Ərazi İdarəetmə və İnfrastruktur Nazirliyi qəzetin sualına cavab verəcəyinə söz versə də, nəşr gün ərzində cavab ala bilməyib.

Oxşar